ଆୟକର ଫାଙ୍କିବା ମାମଲା: ନବ ଦାସଙ୍କ ପୁଅ ବିଶାଳଙ୍କୁ ୧୦ ଘଣ୍ଟା ଜେରା

ଭୁବନେଶ୍ୱର : ଆୟକର ଫାଙ୍କିବା ମାମଲାରେ ପୂର୍ବତନ ସ୍ବାସ୍ଥ୍ୟମନ୍ତ୍ରୀ ସ୍ବର୍ଗତ ନବ ଦାସଙ୍କ ପୁଅ ବିଶାଳ ଦାସଙ୍କୁ ସୋମବାର ଆୟକର ବିଭାଗ ୧୦ ଘଣ୍ଟା ଧରି ଜେରା କରିଛି। ତଦନ୍ତକାରୀ ଅଧିକାରୀ ତାଙ୍କୁ ମାରାଥନ ଜେରା କରିଛନ୍ତି। ‘ଆୟକର ବିଭାଗ ଆଜି ଡାକିଥିଲେ, ତଦନ୍ତରେ ତାଙ୍କୁ ସହଯୋଗ କରୁଛୁ, ଯାହା ପ୍ରଶ୍ନ ପଚାରିଥିଲେ ତା’ର ଉତ୍ତର ଦେଇଛି, ଓଡ଼ିଶା ଜାଣିଛି କ’ଣ ହଉଛି..’ ବୋଲି ଜେରାରୁ ଆୟକର ଭବନରୁ ବାହାରିବା ପରେ ବିଶାଳ ତାଙ୍କ ପ୍ରତିକ୍ରିୟା ରଖିଛନ୍ତି।
ସୂଚନାଯୋଗ୍ୟ, ଗତ ଜୁନ୍‌ ୧୯ ସକାଳୁ ଆୟକର ବିଭାଗ ନବଙ୍କ ସମ୍ବଲପୁର ମୁଦିପଡ଼ା ସ୍ଥିତ ଘର, ଭିଏସଏସ ମାର୍ଗରେ ଥିବା ହୋଟେଲ, ଭାଲୁପାଲି ସ୍ଥିତ ଏକ ହୋଟେଲ ଓ ଅଇଁଠାପାଲିରେ ଥିବା ଏକ ମଲ୍ ଏବଂ ଶାନ୍ତି ନଗରସ୍ଥିତ ସହଯୋଗୀଙ୍କ ଘର ଓ ଦିଲ୍ଲୀ କାର୍ଯ୍ୟାଳୟ ସମେତ ୨୦ଟି ସ୍ଥାନରେ ଚଢ଼ଉ କରିଥିଲା। ଭୁବନେଶ୍ବରରେ ଥିବା ନବଙ୍କ ଘରେ ମଧ୍ୟ ତଦନ୍ତକାରୀ ଦଳ ଛାନ୍‌ଭିନ୍‌ କରିଥିଲା। ୩ ଦିନ ଧରି ଆୟକର ବିଭାଗ ତଦନ୍ତ ଜାରି ରଖିଥିଲା। ଚଢ଼ଉର ଦ୍ବିତୀୟ ଦିନରେ ବିଶାଳଙ୍କୁ ଆୟକର ବିଭାଗ କଲକାତାରୁ ଭୁବନେଶ୍ବର ଆଣି ଜେରା କରିଥିଲା। କୋଇଲା ପରିବହନକୁ ନେଇ ଆୟକର ଠକେଇ ହୋଇଥିବା ଅଭିଯୋଗ ରହିଛି। କୋଇଲା ପରିବହନ ସଂକ୍ରାନ୍ତ ଦସ୍ତାବିଜ୍‌ ଜବତ କରି ଆୟକର ଦଳ ତନାଘନା କରୁଛି। ଅନ୍ୟପଟେ ବିଶାଳଙ୍କର କେତେକ ବେନାମି କମ୍ପାନୀ ଚାଲିଥିବା ତଦନ୍ତକାରୀ ସଂସ୍ଥା ନିକଟରେ ଖବର ରହିଛି। ଏହାକୁ ନେଇ ଆୟକର ବିଭାଗ ବିଶାଳଙ୍କୁ ଘନଘନ ଜେରା କରୁଥିବା ସୂଚନା ରହିଛି।