ମୋହନା : ଗଜପତି ଜିଲ୍ଲା ମୋହନା ବ୍ଳକ ଅନ୍ତର୍ଗତ ପିଣ୍ଡିକି ପଞ୍ଚାୟତ କାର୍ଯ୍ୟାଳୟ ପରିସରରେ ଏଏଫସି ଫାଉଣ୍ଡେସନ ନୂଆଦିଲ୍ଲୀର ସହଯୋଗ ଓ ଗଜପତି ପ୍ରକଳ୍ପ ଏବଂ ଓଡିଶା ଜୀବିକା ମିଶନ ମୋହନାର ମିଳିତ ଆନୁକୂଲ୍ୟରେ ଜନ ଜାତୀୟ ଗୌରବ ଦିବସ ପାଳିତ ହୋଇଯାଇଛି । ଏଏଫସି ଫାଉଣ୍ଡେସନର କାର୍ଯ୍ୟକ୍ରମ ସଞ୍ଚାଳକ ନୀଳମାଧବ ବିଶାଲ, ଜିଲ୍ଲା ସଂଯୋଜକ ବାଳକୁଷ୍ଣ ସାହୁ , ଓଡିଶା ଜୀବିକା ମିଶନର ଦେବସ୍ମିତା ଲେଙ୍କା ପ୍ରମୁଖ ଏହି ଦିବସରେ ଯୋଗ ଦେଇଥିଲେ । ଏହି ଅବସରରେ ଶ୍ରୀ ଦିଗାଲ ସ୍ଵାଧୀନତା ସଂଗ୍ରାମୀ ବୀର ବିର୍ସା ମୁଣ୍ଡାଙ୍କ ସମାଜ ଗଠନରେ ପ୍ରମୁଖ ଭୂମିଳା ଏବଂ ସ୍ଵାଧୀନତା ଆନ୍ଦୋଳନରେ ତାଙ୍କର ଗୁରୁତ୍ଵପୂର୍ଣ୍ଣ ଅବଦାନ ସଂପର୍କରେ ମତବ୍ୟକ୍ତ କହିଥିବା ବେଳେ ଜିଲ୍ଲା ସଂଯୋଜକ ଶ୍ରୀ ସାହୁ ଆଦିବାସୀ ଓ ଗରୀବ ଲୋକମାନଙ୍କ ବିକାଶ ପାଇଁ ଜଙ୍ଗଲ ଅଧିକାର ଆଇନ-୨୦୦୬, ଜନଧନ ଯୋଜନା, ସର୍ବନିମ୍ନ ସହାୟକ ମୂଲ୍ୟ ଆଦି ଜନହିତକର କାର୍ଯ୍ୟକ୍ରମ ଉପରେ ଆଲୋକପାତ କରିଥିଲେ । ଓଡିଶା ଜୀବିକା ମିଶନର ଶ୍ରୀମତୀ ଲେଙ୍କା ମହିଳାମାନଙ୍କ ପାଇଁ ରହିଥିବା ସରକାରୀ ସୁବିଧା ଓ ଫାଇଦା ସଂପର୍କରେ କହିଥିଲେ।ଏହି କାର୍ଯ୍ୟକ୍ରମରେ ଗ୍ରାମ ପଞ୍ଚାୟତ ସ୍ତରୀୟ ସଭାପତି, ସମ୍ପାଦିକା, ସିଆର ସଭ୍ୟ, ଏମବିକେ ଏବଂ ସ୍ଵୟଂ ସହାୟିକା ଦଳର ଶତାଧିକ କର୍ମୀ ଯୋଗ ଦେଇଥିଲେ।
