ପାଟନା: ବିହାରରେ ଆଇନଶୃଙ୍ଖଳା ବ୍ୟବସ୍ଥା ବିପର୍ଯ୍ୟସ୍ତ ହୋଇପଡିଛି । ରାଜ୍ୟରେ ବେଆଇନ କାର୍ଯ୍ୟକଳାପ ଦିନକୁ ଦିନ ବୃଦ୍ଧି ପାଉଥିବା ବେଳେ ଭିଡ ହିଂସା ମଧ୍ୟ ବଢିବାରେ ଲାଗିଛି । ଏଭଳି ସ୍ଥିତିରେ ବିହାର ସୀତାମାଢି ଜେଲର ଏକ ଦୃଶ୍ୟ ସାମ୍ନାକୁ ଆସିଛି । କଏଦୀମାନେ ଜେଲରେ ଜନ୍ମଦିନର ଉତ୍ସବ ପାଳନ କରୁଥିବା ବେଳେ ଭୋଜି ଭାତର ଆସର ଜମାଇଥିବା ଦେଖିବାକୁ ମିଳିଛି । ଏହି ଦୃଶ୍ୟର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍ ହେବାରେ ଲାଗିଛି ।
ମିଳିଥିବା ସୂଚନା ଅନୁଯାୟୀ, ଦରଭଙ୍ଗାର ଡବଲ୍ ଇଞ୍ଜିନିୟର୍ ହତ୍ୟା ମାମଲାରେ ପିଣ୍ଟୁ ତିଓ୍ଵାରି ନାମକ ଜଣେ ଅଭିଯୁକ୍ତ ସୀତାମାଢି ଜେଲରେ ଆଜୀବନ କାରାଦଣ୍ଡ ଭୋଗୁଛି । ହେଲେ ଗତ ଗୁରୁବାର ସନ୍ଧ୍ୟାରେ ଜେଲ ମଧ୍ୟରେ ଅନ୍ୟ କଏଦୀଙ୍କ ସହ ମିଶି ସେ ଜନ୍ମଦିନ ଉତ୍ସବ ପାଳନ କରି ଏବେ ଚର୍ଚ୍ଚାକୁ ଆସିଛି । ଜନ୍ମଦିନର କେକ୍ କାଟିବା ସହ କଏଦୀମାନଙ୍କୁ ମିଠା ବାଣ୍ଟିଛି । ସେହିପରି ଅନ୍ୟ କଏଦୀମାନେ ମଧ୍ୟ ପିଣ୍ଟୁକୁ ଉପହାର ପ୍ରଦାନ କରିଛନ୍ତି । ଏହା ପରେ ପିଣ୍ଟୁ ଅନ୍ୟ କଏଦୀମାନଙ୍କୁ ଆମିଷ ଓ ନିରାମିଷ ଭୋଜି ଦେଇଥିଲା । ଏମାନେ ସମସ୍ତେ ଚଟାଣରେ ବସି ଭାତ ଓ ଖାସି ମାଂସ ତରକାରି ଖାଉଥିବା ଭିଡିଓରେ ଦେଖିବାକୁ ମିଳିଛି । ଜେଲ ମଧ୍ୟରେ ସମ୍ପୂର୍ଣ୍ଣ ଜନ୍ମୋତ୍ସବ ପାଳନକୁ ଏକ ମୋବାଇଲ ଫୋନରେ ରେକର୍ଡ କରାଯାଇଛି ।
ସାମାଜିକ ଗଣମାଧ୍ୟମରେ ଭିଡିଓ ଭାଇରାଲ୍ ହେବା ପରେ ଜେଲ ମୁଖ୍ୟାଳୟ ପକ୍ଷରୁ ତତ୍ପରତା ପ୍ରକାଶ ପାଇଛି । ଏହାର ତଦନ୍ତ ପାଇଁ ଜିଲା ମୁଜାଫରପୁରର କେନ୍ଦ୍ରୀୟ ଜେଲ ଅଧୀକ୍ଷକ ରାଜୀବ କୁମାର ସିଂହଙ୍କୁ ଦାୟିତ୍ବ ଦିଆଯାଇଛି । ଶନିବାର ରାତିରେ ଜେଲ ଅଧୀକ୍ଷକ ରାଜୀବ କୁମାର ସିଂହ ସୀତାମଢି ଜେଲରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।
Bihar: In a video birthday of a criminal, Pintu Tiwari (in black t-shirt), was seen being celebrated inside the premises of Sitamarhi jail. In the video, he can be seen cutting a cake, receiving presents from other inmates and having food with them. pic.twitter.com/8UWzTwBZLH
— ANI (@ANI) 1 September 2019
