‘ଅପରେସନ ସିନ୍ଦୂର’ ପରେ ଛୁଟିରେ ଘରକୁ ଆସିଥିଲେ ଯବାନ; ଏମିତି ହେଲା ମୃତ୍ୟୁ

ସମାଜ ଡିଜିଟାଲ ଡେସ୍କ:  ‘ଅପରେସନ ସିନ୍ଦୂର’ର ସଫଳତା ପରେ ଛୁଟିରେ ଘରକୁ ଆସିଥିଲେ ଯବାନ । ଦାଦାଙ୍କ ଦଶାହ କାର୍ଯ୍ୟରେ ସାମିଲ ହେବାକୁ ଛୁଟି ନେଇ ଘରକୁ ଆସିଥିବା ବେଳେ ବିଏସଏଫ୍‍ ଯବାନଙ୍କ ଅଚାନକ ମୃତ୍ୟୁ ହୋଇଛି । ଏଭଳି ଦୁଃଖଦ ଘଟଣା ଘଟିଛି ବିହାରର ବୈଶାଳୀ ଜିଲ୍ଲାରେ । ଦାଦାଙ୍କ ଦଶାହ କାର୍ଯ୍ୟରେ ଯୋଗଦେବା ପାଇଁ ଘରକୁ ଆସିଥିବା ବିଏସଏଫ୍‍ ଯବାନ ରାଜୁ କୁମାରଙ୍କର ହଠାତ ହୃଦଘାତରେ ମୃତ୍ୟୁ ହୋଇଛି । ରାଜୁ ଜମ୍ମୁ-କାଶ୍ମୀରରେ ବିଏସଏଫ୍‍ ସୈନିକ ଭାବରେ ନିଯୁକ୍ତ ଥିଲେ ଏବଂ ସେ ଅପରେସନ ସିନ୍ଦୂରରେ ମଧ୍ୟ ସାମିଲ ହୋଇଥିଲେ ।

ସୂଚନା ଅନୁଯାୟୀ ରାଜୁ କୁମାର ମେ ୧୭ତାରିଖରେ ତାଙ୍କ ଦାଦାଙ୍କ ଶ୍ରାଦ୍ଧ ଉତ୍ସବରେ ଯୋଗଦେବା ପାଇଁ ବୈଶାଳୀ ଆସିଥିଲେ । ଦାଦା ଚନ୍ଦ୍ରାପ୍‍ ରାୟଙ୍କର କିଛି ଦିନ ତଳେ ଦେହାନ୍ତ ହୋଇଥିଲା । ଶ୍ରାଦ୍ଧର ସପ୍ତମ ଦିନରେ ରାଜୁଙ୍କ ଛାତିରେ ହଠାତ ପ୍ରବଳ ଯନ୍ତ୍ରଣା ଅନୁଭବ କରିଥିଲେ । ପରିବାର ଲୋକ ତୁରନ୍ତ ତାଙ୍କୁ ଡାକ୍ତରଖାନାରେ ଭର୍ତ୍ତି କରିଥିବା ବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପୁଲିସ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି । ରାଜୁଙ୍କ ସମ୍ପର୍କୀୟ କହିଛନ୍ତି ଯେ ୨୦୨୨ମସିହାରେ ରାଜୁ ବିଏସଏଫ୍‍ରେ ନିଯୁକ୍ତି ପାଇଥିଲେ । ସେ ତାଙ୍କ ପରିବାରର ଏକମାତ୍ର ରୋଜଗାରକ୍ଷମ ସଦସ୍ୟ ଥିଲେ । ପିଲାବେଳୁ ମା ଓ ବାପାଙ୍କୁ ହରାଇଥିବା ରାଜୁଙ୍କର ଦୁଇଟି ସନ୍ତାନ ଅଛନ୍ତି ।  ସାତ ଦିନ ଅନ୍ତରରେ ଦାଦା ଓ ପୁତୁରାଙ୍କ ମୃତ୍ୟୁରେ ଭାଙ୍ଗି ପଡିଛନ୍ତି ପରିବାର ସଦସ୍ୟ ।