ଭୁବନ: ଭୁବନ ଏନଏସି ଅନ୍ତର୍ଗତ ୧ ନମ୍ବର ୱାର୍ଡ଼ରୁ ଜଣେ ୨୫ ବର୍ଷୀୟ ଯୁବକ ଓ ୪ ନମ୍ବର ୱାର୍ଡ଼ରୁ ଜଣେ ୪୨ ବର୍ଷୀୟା ମହିଳାଙ୍କର କରୋନା ପଜିଟିଭ ରିପୋର୍ଟ ଆସିଲା ପରେ ଏନଏସି ପ୍ରଶାସନ ତରଫରୁ ଉକ୍ତ ଦୁଇଟି ୱାର୍ଡ଼କୁ ୫ ଦିନ ପର୍ୟ୍ୟନ୍ତ କଣ୍ଟେନମେଣ୍ଟ ଜୋନ ଘୋଷଣା କରାଯାଇଛି। କଣ୍ଟେନମେଣ୍ଟର ଆଜି ତୃତୀୟ ଦିନରେ ପୁଲିସ ପକ୍ଷରୁ କଡା ପହରା ଦିଆଯାଇଥିଲା। କଣ୍ଟେନମେଣ୍ଟ ଜୋନ ଭିତରକୁ କାହାକୁ ଛଡାଯାଉ ନ ଥିଲା, କେବଳ ଜରୁରୀକାଳୀଳ ସେବା ବ୍ୟତିତ ଏହି ଜୋନରୁ କାହାରିକୁ ପଦାକୁ ଆସିବାକୁ ଦିଆଯାଇ ନ ଥିଲା।
ତୃତୀୟ ଦିବସ ସୁଦ୍ଧା ଏନଏସି ପ୍ରଶାସନ ତରଫରୁ ଉକ୍ତ ଦୁଇଟି ୱାର୍ଡ଼ରେ ସଂପୃକ୍ତ କରୋନା ସଂକ୍ରମିତ ବ୍ୟକ୍ତି ଓ ମହିଳା କେଉଁ ଲୋକମାନଙ୍କ ସଂସ୍ପର୍ଶରେ ଆସିଛନ୍ତି ସେ ସଂପର୍କରେ ସମୁଦାୟ ୫୪ କଣ୍ଟାକ୍ଟ ଟ୍ରେସିଂ କରାଯାଇଥିଲା। ସଂଧ୍ୟାରେ କାଳୀବଜାର ଛକଠାରେ ଭୁବନ ଥାନା ଏଏସଆଇ ପ୍ରଭାତ କୁମାର ନାୟକ ପୁଲିସ କର୍ମଚାରୀଙ୍କୁ ଧରି ହେଲମେଟ ଚେକିଙ୍ଗ କରିବା ସହ ଲୋକଙ୍କୁ ସଚେତନ କରାଇ ନିଜର ଓ ପରିବାରର ସୁରକ୍ଷା ପାଇଁ ବାହାରକୁ ନ ବାହାରିବା ପାଇଁ ପରାମର୍ଶ ଦେଉଥିଲେ।
