ଭବାନୀପାଟଣା: କୋକସରା ବ୍ଲକ ଅନ୍ତର୍ଗତ ବଡ ପୋଡାଗୁଡ଼ା ଗାଁରେ ଚାଷ ଜମିରେ ପାଣି ମଡାଉଥିବାବେଳେ ବିଦ୍ୟୁତ ଆଘାତରେ ୨ ଜଣ ଚାଷୀଙ୍କ ମୃତ୍ୟୁ ଘଟିଛି। ମୃତକମାନେ ସେହି ଗାଁର ଧନୁର୍ଯ୍ୟ ମଶ୍ରା(୫୩) ଏବଂ କଛାରପଡାର ଅନିରୁଦ୍ଧ ନାଏକ(୫୫) ବୋଲି ଜଣାପଡ଼ିଛି। ସେମାନେ ସମ୍ପର୍କରେ ଶାଳକ ଓ ଭିଣୋଇ।
ସୂଚନା ଅନୁଯାୟୀ, ଗୁରୁବାର ସକାଳେ ଉଭୟ ଚାଷୀ ବଡ଼ ପୋଡ଼ାଗୁଡା ନିକଟସ୍ଥ ମୁଡ୍ରା ନଦୀ କୂଳରେ ଥିବା ଉଠା ଜଳସେଚନ ପ୍ରକଳ୍ପରୁ ନିଜ ଚାଷ ଜମିକୁ ପାଣି ମଡ଼ାଉଥିଲେ। ଏହି ସମୟରେ କୌଣସି କାରଣରୁ ମୋଟରରେ ବିଦ୍ୟୁତ ସଂଯୋଗ ହୋଇଥିଲା। ମୋଟର ସଂସ୍ପର୍ଶରେ ଆସି ଘଟଣାସ୍ଥଳରେ ଉଭୟଙ୍କ ମୃତ୍ୟୁ ଘଟିଛି। ଖବର ପାଇ ପରିବାର ଲୋକେ ଉଭୟଙ୍କୁ ଉଦ୍ଧାର କରି ଆମପାଣି ଥାନା ପୁଲିସକୁ ସୂଚନା ଦେଇଥିଲେ। ଆମପାଣି ପୁଲିସ ପହଞ୍ଚି ପାରିପାର୍ଶ୍ୱିକ ଅବସ୍ଥା ଅନୁଧ୍ୟାନ କରିବାସହ ମୃତଦେହ ଜବତ କରି ଡାକ୍ତରଖାନା ପଠାଇଥିଲା। ବ୍ୟବଚ୍ଛେଦ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯାଇଛି। ଉଭୟଙ୍କ ମୃତ୍ୟୁରେ ଗାଁରେ ଶୋକାକୂଲ ପରିବେଶ ସୃଷ୍ଟି ହୋଇଛି। ମୃତକଙ୍କ ପରିବାରକୁ କ୍ଷତିପୂରଣ ପ୍ରଦାନ ପାଇଁ କୋକସରା ତହସିଲଦାରଙ୍କ ନିକଟରେ ଦାବି ହୋଇଛି।
