ଭବାନିପାଟଣା: ଆୟ ବହିର୍ଭୁତ ସମ୍ପତ୍ତି ଠୁଳ ମାମଲାରେ କଳାହାଣ୍ଡି ଜନ ସ୍ବାସ୍ଥ୍ୟ ବିଭାଗ (ଜିପିଏଚ) ସହକାରୀ ଯନ୍ତ୍ରୀ କିଶୋର ଚନ୍ଦ୍ର ସାହୁଙ୍କ ଠାରୁ ବହୁ ପରିମାଣରେ ଆୟ ବହିର୍ଭୁତ ସମ୍ପତ୍ତି ଠାବ କରିଛି ଭିଜିଲାନ୍ସ। ଆୟ ବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ଯନ୍ତ୍ରୀ ଶ୍ରୀ ସାହୁଙ୍କ ଘର ସମେତ ତିନୋଟି ସ୍ଥାନରେ ଆଜି ସକାଳୁ ଭିଜିଲାନ୍ସ ଚଢାଉ କରୁଛି। ସ୍ଥାନୀୟ ଜଳେଶ୍ଵର ମନ୍ଦିର ରାସ୍ତାରେ ଥିବା ତିନି ମହଲା କୋଠା ସମେତ ତାଙ୍କ ଅଫିସ ଏବଂ ନର୍ଲା ବ୍ଲକ୍ ବଳବସପୁରରେ ଥିବା ତାଙ୍କ ପୈତୃକ ଘରେ ଭିଜିଲାନ୍ସ ଚଢାଉ ଜାରି ରହିଛି।
ଚଢାଉ ବେଳେ ଭବାନୀପାଟଣା ସହର ଜଳେଶ୍ଵର ମନ୍ଦିର ରାସ୍ତାରେ ନିର୍ମିତ ୧୦,୫୦୦ ବର୍ଗ ଫୁଟ ର ତିନି ମହଲା କୋଠା ଠାବ ହୋଇଛି। ଏହାର ଆନୁମାନିକ ମୂଲ୍ୟ ପ୍ରାୟ ଏକ କୋଟି ଦଶ ଲକ୍ଷ ବୋଲି ଆକଳନ କରାଯାଇଛି। ଏଥି ସହିତ ଭବାନିପାଟଣା ସହରାଞ୍ଚଳରେ ୨୩ ଡିସିମିଲର ଦୁଇଟି ପ୍ଲଟ, ପ୍ରାୟ ୧.୫୩ କୋଟି ଟଙ୍କା ମୂଲ୍ୟର ବ୍ୟାଙ୍କ୍, ପୋଷ୍ଟ ଅଫିସ ଏବଂ ଜୀବନ ବୀମା ଜମା ଥିବା ଠାବ ହେଇଛି। ତାଙ୍କ ନିକଟରୁ ୨ ଲକ୍ଷ ୬୫ ହଜାର ନଗଦ ଟଙ୍କା, ଘରୁ ଏବଂ ବ୍ୟାଙ୍କ ଲକରରୁ ୪୪୧ ଗ୍ରାମ ସୁନା ଅଳଙ୍କାର, ୭୦୦ ଗ୍ରାମ ରୂପା ଅଳଙ୍କାର, ୫.୪୭ ଲକ୍ଷ ଟଙ୍କା ମୂଲ୍ୟର ୨ଟି ଦୁଇ ଚକିଆ ଯାନ ମିଳିଥିବା ଭିଜିଲାନ୍ସ ବିଭାଗ ସୂତ୍ରରୁ ପ୍ରକାଶ।
କୋରାପୁଟ ଭିଜିଲାନ୍ସ ଅତିରିକ୍ତ ଏସପି ଅରୁଣ କୁମାର ନାଏକଙ୍କ ନେତୃତ୍ୱ ରେ କଳାହାଣ୍ଡି ଭିଜିଲାନ୍ସ ଡିଏସପି ସଦାନନ୍ଦ ପାଣି, ଡିଏସପି ଦୀନବନ୍ଧୁ ବେହେରା, ଡିଏସପି ଜୟଶ୍ରୀ ପ୍ରଧାନ ପ୍ରମୁଖଙ୍କ ସମେତ ଭିଜିଲାନ୍ସର ତିନୋଟି ଟିମ୍ ଚଢାଉ ଜାରି ରଖିଛି। ଖବର ଲେଖାଯିବା ବେଳକୁ ଯନ୍ତ୍ରୀ ଶ୍ରୀ ସାହୁଙ୍କ ସ୍ଥାନୀୟ ଘର, ଅଫିସ କୋଠରୀ ଏବଂ ନର୍ଲା ବ୍ଲକ୍ ବଲବସପୁର ଗାଁରେ ଥିବା ପୈତୃକ ଘରେ ଭିଜିଲାନ୍ସ ଚଢାଉ ଜାରି ରହିଛି।
Comments are closed.