ବାସୁଦେବପୁର: ସରକାରୀ ବିଦ୍ୟାଳୟ ପ୍ରତି ଛାତ୍ରଛାତ୍ରୀମାନଙ୍କୁ ଆକୃଷ୍ଟ କରିବା ସହିତ ଉନ୍ନତମାନର ଶିକ୍ଷା ବ୍ୟବସ୍ଥା ପାଇଁ ୫ଟି ଯୋଜନାରେ ରୁପାନ୍ତରିତ ବିଦ୍ୟାଳୟ । ହେଲେ ରୁପାନ୍ତରିତ ବିଦ୍ୟାଳୟରେ ପାନୀୟଜଳ ବ୍ୟବସ୍ଥା ଉତ୍କଟ ରୁପ ଧାରଣ କରିଥିବା ବେଳେ ଛାତ୍ରୀମାନଙ୍କ ସହ ଶିକ୍ଷୟତ୍ରୀମାନେ ଶୈାଚ ହେବା ପାଇଁ ବାହାରକୁ ଯିବାକୁ ପଡୁଛି । ଅନେକ ସମୟରେ ଛାତ୍ରୀମାନେ ନାହିଁ ନଥିବା ଅସୁବିଧାରେ ସମ୍ମୁଖୀନ ହେଉଥିବା ଅଭିଯୋଗ ଆସିଛି । ବାସୁଦେବପୁର ବ୍ଲକ ଅଧିନ ସରକାରୀ ୟୁଜି ହାଇସ୍କୁଲ ଗୋବିନ୍ଦପୁରର ବୋଲି ଜଣାପଡିଛି ।
ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ୧୮୨ଜଣ ଛାତ୍ରୀମାନଙ୍କ ସହ ମୋଟ ୩୮୦ଜଣ ଛାତ୍ରଛାତ୍ରୀ ଅଧ୍ୟୟନ କରୁଛନ୍ତି । ଏହି ହାଇସ୍କୁଲରେ ମୋଟ ୧୩ଜଣ ଶିକ୍ଷକଶିକ୍ଷୟତ୍ରୀ ଥିବା ବେଳେ କ୍ରୀଡାଶିକ୍ଷକ ଓ ହିନ୍ଦୀ ଶିକ୍ଷକ ନଥିବା ଜଣାପଡିଛି । ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀମାନଙ୍କ ପାଇଁ ମଧ୍ୟାହ୍ନ ଭୋଜନ ବ୍ୟବସ୍ଥା ଥିବା ବେଳେ ଖାଇବା ପୁର୍ବରୁ ହାତ ଧୋଇବା, ପିଇବା ପାଣିର ଘୋର ଅଭାବ ବୋଲି ପ୍ରଧାନଶିକ୍ଷକ କୃଷ୍ଣଚନ୍ଦ୍ର ବେହେରା କହିଛନ୍ତି । ଏହି ହାଇସ୍କୁଲ ନିକଟ ଦୁଇଶହ ମିଟର ଦୂରରେ ଥିବା ନଳକୂପରୁ ଲୁଣିପାଣି ବାହାରୁଥିବା କାରଣରୁ ତାହା ପିଇବା ପାଇଁ ଅନୁପଯୁକ୍ତ ଥିବା ସହ ରୁପାନ୍ତରିତ ବିଦ୍ୟାଳୟରେ ପାନୀୟଜଳ ବ୍ୟବସ୍ଥା ଓ ଶୈାଚାଳୟ ନିର୍ମାଣ ପାଇଁ ବ୍ୟୟ ବରାଦ ହୋଇଥିଲା ।
ମାତ୍ର ଠିକାଦାର ଅଧାପନ୍ତରିଆ ଭାବରେ କାମକରି ସରକାରଙ୍କ ତହବିଲରୁ ଅର୍ଥ ଉଠାଣ କରିନେଇଥିବା ସ୍ଥାନୀୟ ଅଭିଭାବକମାନେ ଅଭିଯୋଗ କରିଛନ୍ତି । ଏନେଇ ବିଡିଓ ସଞ୍ଜିବକୁମାର ସାହୁ କୁହନ୍ତି, ମୁଁ ଏସଂପର୍କରେ ପୁର୍ବରୁ ଜାଣିନଥିଲି । ତେବେ ଖୁବଶିଘ୍ର ନିର୍ମାଣାଧିନ ପ୍ରକଳ୍ପ ସଂପୁର୍ଣ୍ଣ କରାଯିବାକୁ ପଦକ୍ଷେପ ନିଆଯିବ ।
