କଟକ: ବାରବାଟୀ ଷ୍ଟାଡ଼ିୟମରେ ଆସନ୍ତା ଡିସେମ୍ବର ୯ରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯିବାକୁ ଥିବା ଟ୍ବେଣ୍ଟି୨୦ ମ୍ୟାଚ ପାଇଁ ସୋମବାରଠାରୁ ଅନ୍ଲାଇନ ଟିକଟ ବିକ୍ରି ଆରମ୍ଭ ହେବ। ସାଧାରଣ ଦର୍ଶକଙ୍କ ପାଇଁ ଏହି ଅନ୍ଲାଇନ ଟିକଟ କ୍ରୟ ନିମନ୍ତେ ୧ ତାରିଖ ଅପରାହ୍ଣ ୨ଟାରୁ ‘ଡ୍ରିଷ୍ଟିକ୍ଟ ବାଇ ଜମାଟୋ’ ୱେବସାଇଟ୍ କିମ୍ବା ଆପ୍ ଉପଲବ୍ଧ ହେବ। ଉକ୍ତ ଆପ୍ରେ ଦର୍ଶକ ଟିକଟ ବୁକିଂ କରିପାରିେବ। ଅନ୍ଲାଇନରେ ମୋଟ୍ ୨୦୦୦ ଟିକଟ ଉପଳବ୍ଧ ରହିବ। ଅନ୍ଲାଇନରେ ଗ୍ୟାଲେରୀ ନଂ ୨, ୪ ଓ ୭ ସହ ସହ ଏସି ବକ୍ସ ,ସ୍ପେଶାଲ ଏନକ୍ଲୋଜର ଓ ନ୍ୟୁ ପ୍ୟାଭିଲିୟନ ଟିକଟ ଉପଲବ୍ଧ ରହିବ। ଅନ୍ଲାଇନରେ ଜଣେ ବ୍ୟକ୍ତି ଅତି ବେଶିରେ ଦୁଇଟି ଟିକଟ ବୁକିଂ କରିପାରିବ।
ଅନ୍ଲାଇନରେ ଟିକଟ ବୁକିଂ କରିଥିବା ବ୍ୟକ୍ତିମାନେ ବୁକିଂର ଅସଲି ରସିଦ ଦେଖାଇ ଡିସେମ୍ବର ୮ ତାରିଖ ସକାଳ ୯ଟାରୁ ସନ୍ଧ୍ୟା ୬ଟା ମଧ୍ୟରେ ଓ ୯ ତାରିଖ ସକାଳ ୯ଟାରୁ ଅପରାହ୍ଣ ୧ଟା ମଧ୍ୟରେ କେମ୍ବ୍ରିଜ ସ୍କୁଲ କାଉଣ୍ଟର ନିକଟରୁ ଟିକଟ ସଂଗ୍ରହ କରିପାରିବେ। ଅନ୍ୟପକ୍ଷରେ ଗତ ମ୍ୟାଚରେ ରହିଥିବା ଟିକଟ ମୂଲ୍ୟରେ କୌଣସି ବୃ୍ଦ୍ଧି କରାଯାଇନାହିଁ। ଟିକଟ ଦର ଅପରିବର୍ତ୍ତିତ ରହିଛି ବୋଲି ଓସିଏ ସମ୍ପାଦକ ସଞ୍ଜୟ ବେହେରା ସୂଚନା ଦେଇଛନ୍ତି। ସୂଚନାଯୋଗ୍ୟ, ଗତ ଫେବୃଆରୀରେ ବାରବାଟୀରେ ଖେଳାଯାଇଥିବା ଭାରତ-ଇଂଲଣ୍ଡ ଦିନିକିଆ ମ୍ୟାଚରେ ଅନ୍ଲାଇନରେ ୪୦୦୦ ଟିକଟ ବିକ୍ରି କରାଯାଇଥିଲା। ଏଥିର ୨୦୦୦କୁ ହ୍ରାସ କରି ଦିଆଯାଇଛି।
