ବାଙ୍କୀ : ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୈଦେଶ୍ୱର-ଗୋପୀନାଥପୁର ଟି-ସେତୁର ଲୋକାର୍ପଣ ଉତ୍ସବକୁ ଆସିଥିବା ସମୟରେ ବାଙ୍କୀ କଂଗ୍ରେସ ଓ ବିଜେପି ପକ୍ଷରୁ ବିରୋଧ କରାଯିବାର କାର୍ଯ୍ୟକ୍ରମ ଥିବା ସମ୍ପର୍କରେ ବିଶେଷ ସୂତ୍ରରୁ ଖବର ପାଇ ବାଙ୍କୀ ପୁଲିସ ଶତାଧିକ ବିଜେପି ଓ କଂଗ୍ରେସର ଆଗଧାଡିର ନେତାଙ୍କୁ ବାଙ୍କୀ ଥାନାରେ ଅଟକ ରଖି ମୁଖ୍ୟମନ୍ତ୍ରୀଙ୍କ ପ୍ରତ୍ୟାବର୍ତ୍ତନ ପରେ ଦସ୍ତଖତ ରଖି ଛାଡିଥିବା ପୁଲିସ ସୂତ୍ରରୁ ସୂଚନା ମିଳିଛି।
ସୂଚନା ଅନୁଯାୟୀ ବାଙ୍କୀର ପୂର୍ବତନ ବିଧାୟକ ଡଃ. ଦେବାଶିଷ ପଟ୍ଟନାୟକ ନିଜର ଆଗଧାଡିର କର୍ମୀ ମାନଙ୍କ ସହ ବିରୋଧ ପାଇଁ ପ୍ରସ୍ତୁତ ଥିଲା ବେଳେ ବାଙ୍କୀ ପୁଲିସ କଂଗ୍ରେସ କାର୍ଯ୍ୟାଳୟରେ ପହଞ୍ଚି ସେମାନଙ୍କୁ ଥାନାରେ ଅଟକ ରଖିଛି। ସେହିପରି ବାଙ୍କୀର ପୂର୍ବତନ ବିଧାୟକ ପ୍ରାର୍ଥୀ ତଥା ବିଜେପି ନେତା ସୁଭ୍ରାଂଶୁ ମୋହନ ପାଢୀ ନିଜର ବହୁ ଦଳୀୟ ପଦାଧିକାରୀଙ୍କ ସମେତ ମନ୍ତ୍ରୀଙ୍କ ଗସ୍ତକୁ ବିଜେପି ଦଳର ନିଷ୍ପତ୍ତି କ୍ରମେ ବିରୋଧ କରିବାକୁ ଥିବା ସମୟରେ ପୁଲିସ ସୁଭ୍ରାଂଶୁ ମୋହନ ପାଢୀଙ୍କ ସମେତ ୫୦ରୁ ଅଧିକ କର୍ମୀଙ୍କୁ ଅଟକ ରଖିଥିଲା। ସେହିପରି ବୈଦେଶ୍ୱର ଥାନାରେ ବିଜେପି ସଭାପତି ସୁଶାନ୍ତ ଭଟ୍ଟ,ରବୀନ୍ଦ୍ର କୁମାର ସାହୁଙ୍କ ସମେତ ୧୦ରୁ ଅଧିକ କର୍ମୀଙ୍କୁ ଅଟକ ରଖିଥିଲା।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୈଦେଶ୍ୱର ଦିଶା ପଡିଆଠାରୁ ହେଲିକାପ୍ଟର ଯୋଗେ ଭୁବନେଶ୍ୱର ଫେରିଲା ପରେ ବିଭାଗୀୟ ମନ୍ତ୍ରୀଙ୍କ କାରରେ ବୈଦେଶ୍ୱର ବାଙ୍କୀ ରାସ୍ତାରେ ଫେରୁଥିବା ସମୟରେ ବାଙ୍କୀ ସ୍ୱୟଂ ଶାସିତ ମହାବିଦ୍ୟାଳୟ ନିକଟରେ ଗାଡି ଉପରକୁ ଅଣ୍ଡା ମାଡ କରାଯାଇଥିବା ସୂଚନା ମିଳିଛି।
Comments are closed.