ନୂଆଦିଲ୍ଲୀ : ଦେଶରେ ଗତବର୍ଷ ସୁଦ୍ଧା ହୋଇଥିବା ୧୦୦ଟି ବଡ଼ ବ୍ୟାଙ୍କ ଠକେଇ ମାମଲାର ତଦନ୍ତ କରାଯାଇ କର୍ମଚାରୀମାନଙ୍କୁ ଉତ୍ତରଦାୟୀ କରାଯିବା ସହିତ ଋଣ ଆଦାୟ ଦିଗରେ ପଦକ୍ଷେପ ନିଆଯିବ ବୋଲି କେନ୍ଦ୍ରୀୟ ଭିଜିଲାନ୍ସ କମିଶନର ଡକ୍ଟର ଟି.ଏମ୍. ଭସିନ୍ କହିଛନ୍ତି। ୧୦୦ଟି ବଡ଼ ବ୍ୟାଙ୍କ ଠକେଇ ସଂକ୍ରାନ୍ତରେ ସେ ସମୀକ୍ଷା ଓ ବିଶ୍ଳେଷଣ କରିଛନ୍ତି। ଏହି ସମୀକ୍ଷା ସଂକ୍ରାନ୍ତରେ ସବିଶେଷ ସୂଚନା ଦେଇ ଡକ୍ଟର ଭାସିନ୍ କହିଛନ୍ତି ଗହଣା ଓ ମୁକ୍ତା ପଥର,ବିନିର୍ମାଣ, କୃଷିକ୍ଷେତ୍ର, ବିମାନ ଚଳାଚଳ, ସେବା, ବାଣିଜ୍ୟ କ୍ଷେତ୍ର, ଆଇଟି କ୍ଷେତ୍ର, ରପ୍ତାନୀ, ଫିକ୍ସଡ୍ ଡିପୋଜିଟ୍ ଏବଂ ଡିମାଣ୍ଡ୍ ଲୋନ୍ ଆଦି ୧୩ଟି କ୍ଷେତ୍ର ଉପରେ ଏହି ସମୀକ୍ଷା କରାଯାଇଛି। ଗୋପନୀୟତା ରକ୍ଷା କରିବା ପାଇଁ ଋଣ ଗ୍ରହୀତାମାନଙ୍କ ନାମ ଓ ବ୍ୟାଙ୍କଗୁଡ଼ିକର ନାମ ରିପୋର୍ଟରେ ପ୍ରକାଶ କରାଯାଇ ନାହିଁ। ତେବେ ଏ କ୍ଷେତ୍ରରେ ତଦନ୍ତ କରାଯାଇ କର୍ମଚାରୀମାନଙ୍କୁ ଉତ୍ତରଦାୟୀ କରିବା ଏବଂ ଋଣ ଆଦାୟ ଦିଗରେ ପଦକ୍ଷେପ ନେବା ପାଇଁ ରିପୋର୍ଟରେ ସୁପାରିଶ୍ କରାଯାଇଛି ବୋଲି ସେ କହିଛନ୍ତି। ଋଣ ଦିଆଯାଇଥିବା ପ୍ରଣାଳୀକୁ ତନ୍ନତନ୍ନ କରି ପରୀକ୍ଷା ନିରୀକ୍ଷା କରାଯାଇ ଥିବାବେଳେ ସେଥିରେ ବିଭିନ୍ନ ତ୍ରୁଟି ଥିବାର ପରିଲକ୍ଷିତ ହୋଇଛି ଡକ୍ଟର ଭାସିନ୍ କହିଛନ୍ତି। ଭବିଷ୍ୟତରେ ଏଭଳି ଠକେଇର ପୁନରାବୃତ୍ତିକୁ ରୋକିବା ଲକ୍ଷ୍ୟରେ କମିଶନ ଦ୍ୱାରା ଏହି ବିଶ୍ଳେଷଣାତ୍ମକ ଅଧ୍ୟୟନ କରାଯାଇଥିଲା। ଅନ୍ୟପକ୍ଷରେ ଭିଜିଲାନ୍ସ କମିଶନ ପକ୍ଷରୁ ଦିଆଯାଇଥିବା ମତାମତ ଅତ୍ୟନ୍ତ ଉପଯୋଗୀ ଏବଂ ବ୍ୟାଙ୍କ୍ଗୁଡ଼ିକରେ ଏଭଳି ବିପଦକୁ ପର୍ଯ୍ୟାୟକ୍ରମେ ଦୂର କରିବାପାଇଁ ଏହି ସୁପାରିସକୁ ବ୍ୟବହାର କରାଯିବ ବୋଲି ରିଜର୍ଭ ବ୍ୟାଙ୍କ୍ ପକ୍ଷରୁ କୁହାଯାଇଛି।
