ସୋର: ବୁଧବାର ଅପରାହ୍ଣରେ ବାଲେଶ୍ୱର ଜିଲା ଅନ୍ତର୍ଗତ ସୋର-କୁପାରୀ ରାସ୍ତାର ନଦୀଗାଁ ସରଶଙ୍ଖ ମହାନାଳ ପୋଲ ନିକଟରେ ଦୁର୍ବୃତ୍ତମାନେ ଗୁଳି ଫୁଟାଇ ପିପୁଲସ୍ ଫୋରମ ଡିସିବି ବ୍ୟାଙ୍କ କର୍ମଚାରୀଙ୍କ ଆଖିରେ ଲଙ୍କାଗୁଣ୍ଡ ପକାଇ ଦେଢ଼ ଲକ୍ଷ ଟଙ୍କା ଲୁଟି ନେଇଛନ୍ତି। ଖାଲି ସେତିକି ନୁହେଁ ସ୍କୁଟି ଡିକି ଚାବି ଖୋଲି ମନିପର୍ସ, ଡିଏଲ୍ ଓ ଦେଢ଼ହଜାର ଟଙ୍କା, ମୋବାଇଲ ମଧ୍ୟ ଲୁଟି ନେଇଛନ୍ତି। ଅଭିଯୋଗ ପାଇବା ପରେ ସୋର ପୁଲିସ ତଦନ୍ତ ଆରମ୍ଭ କରିଛି।
ସୋର-କୁପାରୀ ରାସ୍ତାରେ ଡିସିବି ବ୍ୟାଙ୍କ ସୋର ଶାଖାର କର୍ମଚାରୀ ଚଣ୍ଡୀଖୋଲ ଅଞ୍ଚଳର ନରେନ୍ଦ୍ର ପୃଷ୍ଟିଙ୍କ ପୁତ୍ର ଆଲୋକ କୁମାର ପୃଷ୍ଟି ଖଇରା ଦେଉଳି ଓ ଅନ୍ୟ କେତେକ ସ୍ଥାନରୁ କମ୍ପାନୀର ଦେଢ଼ ଲକ୍ଷ ଟଙ୍କା ଆଦାୟ କରି ତାଙ୍କ ସ୍କୁଟି ଓଡି-୦୪ଏଫ୭୦୧୨ ସୋର ଫେରୁଥିଲେ। ତାଙ୍କୁ ଅନୁସରଣ କରି ଏକ ସ୍ପେଣ୍ଡରରେ ବାଇକରେ ୩ ଜଣ ଦୁର୍ବୃତ୍ତ ଆସି ନଦୀଗାଁ-ସରଶଙ୍ଖ ରାସ୍ତା ମଝିରେ ମହାନାଳ ପୋଲ ନିକଟରେ ଗୋଟିଏ ରାଉଣ୍ଡ ଗୁଳି ଚଳାଇ ଥିଲେ। ଭୟରେ ଆଲୋକ ସ୍କୁଟି ସହିତ ପଡ଼ି ଯିବା ଫଳରେ ତାଙ୍କ ଆଖିକୁ ଲଙ୍କାଗୁଣ୍ଡ ପକାଇ ବ୍ୟାଗ ସହିତ ଟଙ୍କା ଛଡ଼ାଇ ନେଇଥିଲେ। ସ୍କୁଟିରୁ ଚାବି ଆଣି ଡିକି ଖୋଲି ସେଥିରେ ଥିବା ମନିପର୍ସ, ଡିଏଲ୍, ଦେଢ଼ ହଜାର ଟଙ୍କା ଓ ମୋବାଇଲ ନେଇ ସୋର ଆଡ଼କୁ ପଳାଇ ଆସିଥିଲେ। ଖବର ପାଇ ସୋର ପୁଲିସ୍ ଘଟଣାସ୍ଥଳରେ ପହଞ୍ଚି ଅନୁସନ୍ଧାନ ଜାରି ରଖିଛି। ଆଲୋକ ଓ ଅଫିସ କର୍ମଚାରୀ ସୋର ଥାନାରେ ପହଞ୍ଚି ଅଭିଯୋଗ କରିଛନ୍ତି। ପୁଲିସ୍ ଏକ ମାମଲା ରୁଜୁ କରି ତଦନ୍ତ ଚଳାଇଛି। ଦିନ ଦ୍ୱିପ୍ରହରେ ସୋର ଅଞ୍ଚଳରେ ଗୁଳି ଚାଳନା, ଛିନତାଇ, ରାହାଜାନି ଓ ଡକାୟତି ଭଳି ଘଟଣା ବଢିବାରେ ଲାଗିଥିବାରୁ ଅଞ୍ଚଳବାସୀ ଭୟଭୀତ ହୋଇପଡ଼ିଛି। ଅନ୍ୟପକ୍ଷେ କୌଣସି ଘଟଣାରେ ଜଣେ ହେଲେ ବି ଲୁଟେରା ଧରାପଡ଼ି ନାହାନ୍ତି।
