ବାଲେଶ୍ୱର: ବାଲେଶ୍ୱର ଜିଲ୍ଲାରେ ଆଜି ପାଗରେ ପରିବର୍ତନ ଆସିଛି। ଆକାଶ ନିର୍ମଳ ରହିଛି। ବୁଢ଼ାବଳଙ୍ଗ ସୁବର୍ଣ୍ଣରେଖା ନଦୀରେ ବନ୍ୟା ଆସି ବ୍ୟାପକ ଚାଷ ଜମିରେ ବନ୍ୟା ଜଳ ମାଡିଯାଇଛି। ଅଧିକାଂଶ ଗ୍ରାମ୍ୟ ରାସ୍ତା ପାଣିରେ ବୁଡି ରହିଛି। ରାସ୍ତା ଉପରେ ଆଣ୍ଠୁଏ ଉଚ୍ଚରେ ପାଣି ପ୍ରବାହିତ ହେଉଛି। ଫଳରେ ବାଲେଶ୍ୱର ଓ ଫୁଲାଡ଼ି ରାସ୍ତା ଉପରେ ବନ୍ୟା ଜଳ ପ୍ରବାହିତ ହେଉଥିବାରୁ ଯୋଗାଯୋଗ ବିଚ୍ଛିନ୍ନ ହୋଇଛି। ପୋଲିସ ସେହି ରାସ୍ତାରେ କାହାକୁ ଛାଡୁନାହିଁ।
ସେହିପରି ଫୁଲାଡ଼ି ଗ୍ରାମ୍ୟ ରାସ୍ତା ମଧ୍ୟ ବୁଡିଯାଇଛି। ବସ୍ତା ବ୍ଲକ ଅନ୍ତର୍ଗତ ଜଳକା ନଦୀର ଜଳସ୍ତର ବୃଦ୍ଧି ଘଟି ବହୁ ଚାଷ ଜମି ଜଳମଗ୍ନ ହୋଇଛି। ଜଳସେଚନ ବିଭାଗ ପକ୍ଷରୁ ମିଳିଥିବା ତଥ୍ୟ ଅନୁସାରେ ଆଜି ଦିନ ଗୋଟାଏ ସୁଦ୍ଧା ବନ୍ୟା ଜଳ ବିପଦ ସଂକେତ ସ୍ତର ଉପରେ ପ୍ରବାହିତ ହେଉଛି। ଜଳକା ନଦୀର ବିପଦ ସଂକେତ ସ୍ତର ୫.୫୦ ମିଟର ଥିବା ବେଳେ ବନ୍ୟା ଜଳ ୬.୬୯ ମିଟରରେ ପ୍ରବାହିତ ହେଉଛି। ଜିଲ୍ଲାର ଅନ୍ୟ ପ୍ରମୁଖ ନଦୀ ବୁଢ଼ାବଳଙ୍ଗ ଦିନ ଗୋଟାଏ ସୁଦ୍ଧା ୮.୪୦ ମିଟରରେ ପ୍ରବାହିତ ହେଉଛି। ତାର ବିପଦ ସଂକେତ ସ୍ତର ୮.୧୩ ମିଟର।
ସୁବର୍ଣ୍ଣରେଖା ନଦୀର ଜଳସ୍ତର ବୃଦ୍ଧି ଘଟୁଥିଲେ ମଧ୍ୟ ବିପଦ ସଂକେତ ସ୍ତର ତଳେ ପ୍ରବାହିତ ହେଉଥିବା ଜଳସେଚନ ବିଭାଗର ନିର୍ବାହୀ ଯନ୍ତ୍ରୀ କହିଛନ୍ତି। ଏହି ବନ୍ୟା ଯୋଗୁଁ ନଦୀ କୂଳରେ ବସବାସ କରୁଥିବା ଲୋକେ ଇଟା ଭାଟିରେ କାମକରୁଥିବା ବ୍ୟକ୍ତିମାନଙ୍କ ଘର ପାଣିରେ ବୁଡି ଯାଇଛି। ସେମାନେ ରାସ୍ତା ଉପରେ ରହିବାକୁ ବାଧ୍ୟ ହୋଇଛନ୍ତି।
