ଭୁବନେଶ୍ବର: ଦୁର୍ଘଟଣାଗ୍ରସ୍ତ କରମଣ୍ଡଳ ଏକ୍ସପ୍ରେସର ୨ ଡ୍ରାଇଭର ଓ ଗାର୍ଡଙ୍କ ବୟାନ ରେକର୍ଡ ହୋଇଛି ବୋଲି ଦକ୍ଷିଣପୂର୍ବ ରେଳପଥ ମୁଖ୍ୟ ଲୋକସମ୍ପର୍କ ଅଧିକାରୀ ଆଦିତ୍ୟ ଚୌଧୁରୀ ସୂଚନା ଦେଇଛନ୍ତି। ଶ୍ରୀ ଚୌଧୁରୀ କହିଛନ୍ତି ଯେ ଉଭୟ ଲୋକୋ ପାଇଲଟ ଓ ଗାର୍ଡ ଭୁବନେଶ୍ବର ଏମ୍ସରେ ଚିକିତ୍ସାଧୀନ ଅଛନ୍ତି। ୩ଜଣଙ୍କ ଅବସ୍ଥା ସ୍ଥିର ରହିଛି। ସେମାନଙ୍କ ବୟାନ ରେକର୍ଡ ହୋଇଛି। ଏହି ୩ଜଣଙ୍କ ସହ ଷ୍ଟେସନରେ କାର୍ଯ୍ୟରତ ଅନ୍ୟମାନଙ୍କ ବୟାନ ନିଆଯାଇଛି। ଷ୍ଟେସନର ମେଣ୍ଟେନର, ପଏଣ୍ଟମ୍ୟାନଙ୍କ ବୟାନ ରେକର୍ଡ ହୋଇଛି।
୨ ଡ୍ରାଇଭର ଓ ଗାର୍ଡଙ୍କ ବୟାନ ଅନୁଯାୟୀ କରମଣ୍ଡଳ ପାଇଁ ମେନ ଲାଇନରେ ଗ୍ରୀନ ସିଗ୍ନାଲ ଥିଲା। ଗ୍ରୀନ ସିଗ୍ନାଲ ଥିବାରୁ ନିର୍ଦ୍ଧାରିତ ଗତିରେ ଟ୍ରେନ ଯାଉଥିଲା। କରମଣ୍ଡଳର ଅନୁମୋଦିତ ବେଗ ୧୩୦ କିମି। ଟ୍ରେନ ୧୨୮ କିମି ବେଗରେ ଗତି କରୁଥିଲା। ବାହାନଗା ଷ୍ଟେସନରୁ ମାତ୍ର କିଛି ଦୂରରେ କରମଣ୍ଡଳ ଲୁପ ଲାଇନକୁ ଚାଲିଯାଇଥିଲା। ସେଠାରେ ଠିଆ ହୋଇଥିବା ମାଲବାହୀ ଟ୍ରେନ ସହ ଧକ୍କା ହୋଇଥିଲା। ଏବେ ରେଲୱେ ସେଫ୍ଟି କମିଶନର ଓ ସିବିଆଇ ଉଭୟ ତଦନ୍ତ କରିବେ। ଉଭୟଙ୍କ ଦନ୍ତ ରିପୋର୍ଟ ମିଳିବା ପରେ ସେହି ଅନୁସାରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଦକ୍ଷିଣପୂର୍ବ ରେଳପଥ ମୁଖ୍ୟ ଲୋକସମ୍ପର୍କ ଅଧିକାରୀ ଆଦିତ୍ୟ ଚୌଧୁରୀ ପ୍ରକାଶ କରିଛନ୍ତି।
