ବୁର୍ଲା: ଅପରାଧୀଙ୍କ ଚରାଭୂଇଁ ପାଲଟିଛି ସମ୍ବଲପୁର ସହର । ଏବେ ଅଇଁଠାପାଲି ବସଷ୍ଟାଣ୍ଡ ଅଞ୍ଚଳ ଅପରାଧୀଙ୍କ ନଜରରେ ରହିଥିବା ଜଣାପଡ଼ିଛି । ଗୁରୁବାର ବିଳମ୍ବିତ ରାତିରେ ଏକ ଘରୋଇ ବସ୍ର ହେଲପରଙ୍କୁ କିଛି ଦୁର୍ବୃତ୍ତ ଗୋଡ଼ାଇ ଗୋଡ଼ାଇ ଖଣ୍ଡାରେ ଆକ୍ରମଣ କରିଥିବା ଅଭିଯୋଗ ହୋଇଛି । ଗୁରୁତର ଅବସ୍ଥାରେ ହେଲପରଙ୍କୁ ପ୍ରଥମେ ସମ୍ବଲପୁର ଜିଲା ମୁଖ୍ୟ ଚିକିତ୍ସାଳୟ ଏବଂ ପରେ ଭିମସାରକୁ ଆଣି ଚିକିତ୍ସା କରାଯାଉଥିବା ସୂଚନା ମିଳିଛି । ଗୁରୁତର ଯୁବକ ହେଲେ ଅନୁଗୁଳ ଜିଲା ଆଠମଲ୍ଲିକ ଥାନା କିଶୋର ନଗର ଅଞ୍ଚଳର ଭୁବନ ବେହେରା । ଭୁବନ ହେଲପର ଭାବେ କାମ କରୁଥିବା ଘରୋଇ ବସ୍ର ମାଲିକ ସରୋଜ କୁମାର ପାତ୍ର ଅଇଁଠାପଲି ଥାନାରେ ଏ ନେଇ ଲିଖିତ ଅଭିଯୋଗ କରିଛନ୍ତି । ଅଭିଯୋଗକୁ ଭିତ୍ତିକରି ପୁଲିସ ତଦନ୍ତ ଆରମ୍ଭ କରିଛି ।
ମିଳିଥିବା ସୂଚନା ଅନୁସାରେ, ସମଲେଶ୍ବରୀ ବସ୍ ସବୁଦିନ ପରି ଗତକାଲି ରାତିରେ ଅଇଁଠାପଲି ବସଷ୍ଟାଣ୍ଡରେ ରହିଥିଲା । ବସ୍ର ହେଲପର ଭୁବନ ଶୋଇଥିଲେ । ବିଳମ୍ବିତ ରାତି ପ୍ରାୟ ୨ଟା ସମୟରେ ସେ ପରିଶ୍ରା ପାଇଁ ବାହାରକୁ ବାହାରିଥିଲେ । ଏହି ସମୟରେ ସେଠାରେ ଏକାଧିକ ଦୁର୍ବୃତ୍ତ ଭୁବନଙ୍କୁ ଅଟକାଇ ଦାଦା ବଟି ମାଗିଥିଲେ । ତେବେ ଭୁବନ ତାଙ୍କ ପାଖରେ ଟଙ୍କା ନ ଥିବା କହିବାରୁ ଦୁର୍ବୃତ୍ତମାନେ ଭୁବନଙ୍କୁ ବସ୍ ଷ୍ଟାଣ୍ଡରେ ଗୋଡ଼ାଇ ଗୋଡ଼ାଇ ଖଣ୍ଡାରେ ଆକ୍ରମଣ କରିଥିଲେ । ଫଳରେ ଭୁବନ ଗୁରୁତର ଭାବେ ଆହତ ହୋଇଥିଲେ । ତାଙ୍କ ପେଟ, ମୁଣ୍ଡ, ପିଠି ସମେତ ବିଭିନ୍ନ ସ୍ଥାନରେ ଗଭୀର କ୍ଷତ ହୋଇଛି । ବୁର୍ଲା ମେଡିକାଲରେ ତାଙ୍କର ଚିକିତ୍ସା ଚାଲିଥିବା ଜଣାପଡିଛି ।
Comments are closed.