ରେଙ୍ଗାଲି: ରେଙ୍ଗାଲି ବ୍ଳକର ଖିଣ୍ଡା ପଞ୍ଚାୟତରେ ଥିବା ଏନ୍ଏଲ୍ସି କମ୍ପାନୀର କୋଇଲା ଖଣିକୁ ପଶି ଗତକାଲି ଅପରାହ୍ନରେ ତଲବିରା ଗ୍ରାମର ଦଳେ ଯୁବକ ଖଣିରେ କାର୍ୟ୍ୟରତ ଇଞ୍ଜିନିୟର, ଅପରେଟର, ସୁରକ୍ଷା କର୍ମୀ, ସୁପରଭାଇଜରମାନଙ୍କୁ ଆକ୍ରମଣ କରିଥିବା ଠେଲକୁଲି ଥାନା ଆଇଆସି ସୁରୁବାବୁ ଛତ୍ରିଆଙ୍କ ଠାରୁ ପ୍ରାପ୍ତ ସୂଚନାରୁ ପ୍ରକାଶ। ଆକ୍ରମଣରେ ସଂପୃକ୍ତ ଥିବା ୪ଜଣ ଅଭିଯୁକ୍ତଙ୍କୁ ଗିରଫ କରି ଆଜି କୋର୍ଟ ଚାଲାଣ କରାଯାଇଛି ବୋଲି ଆଇଆଇସି ଶ୍ରୀ ଛତ୍ରିଆ କହିଛନ୍ତି।
କୋର୍ଟ ଚାଲାଣ କରାଯାଇଥିବା ଅଭିଯୁକ୍ତମାନେ ହେଲେ ପ୍ରଦୀପକୁମାର ପାତ୍ର(୪୬), ସଚିତାନନ୍ଦ ସାହୁ(୩୫), ଉମାକାନ୍ତ ସାଲିମା(୪୨) ଏବଂ ମନୋରଞ୍ଜନ ବିଶ୍ୱାଲ (୪୦)। ଫେରାର୍ ଥିବା ଆକ୍ରମଣକାରୀ ମାନଙ୍କୁ ଧରିବା ପାଇଁ ତନାଘନା ଜାରି ରହିଛି ବୋଲି ଆଇଆସି କହିଛନ୍ତି। ଖଣି ପରିସରରେ କାର୍ୟ୍ୟରତ କର୍ମଚାରୀମାନଙ୍କ ଉପରେ ଆକ୍ରମଣ କରି ମାଡପିଟ କରୁଥିବା ସଂକ୍ରାନ୍ତରେ କମ୍ପାନୀ ପକ୍ଷରୁ ସୂଚନା ପାଇଲା ପରେ ଆଇଆସି ଛତ୍ରିଆ ସଦଳବଳେ ଘଟଣା ସ୍ଥଳକୁ ପହଞ୍ଚି ଗଣ୍ଡଗୋଳ ଏବଂ ଆକ୍ରମଣ କରୁଥିବା ଗୋଷ୍ଠିଙ୍କ ମଧ୍ୟରୁ ୪ଜଣଙ୍କୁ କାବୁ କରିଥିବା ବେଳେ ଅନ୍ୟମାନେ ପୁଲିସକୁ ଚକମା ଦେଇ ଫେରାର୍ ମାରିଥିଲେ। ଆକ୍ରମଣରେ ୮/୧୦ ଜଣ କର୍ମଚାରୀ ଗୁରୁତର ଆହତ ହୋଇଛନ୍ତି ବୋଲି ଆଆଇସିଙ୍କ ଠାରୁ ପ୍ରାପ୍ତ ସୂଚନାରୁ ପ୍ରକାଶ। ଖଣିରେ ନିଯୁକ୍ତିକୁ ନେଇ ଏହି ଘଟଣା ଘଟିଥିବା କୁହାଯାଉଛି। ତେବେ ଏହି ଘଟଣା ସଂକ୍ରାନ୍ତରେ ଖଣି କର୍ତ୍ତୃପକ୍ଷଙ୍କ ମତାମତ ଜାଣିବା ପାଇଁ ଟେଲିଫୋନରେ ଯୋଗାଯୋଗ କରାଯାଇଥିଲେ ମଧ୍ୟ ଯୋଗାଯୋଗ ସମ୍ଭବ ହୋଇ ନ ଥିଲା।
