ଆଠଗଡ: ପବିତ୍ର ସୂନାନପୃର୍ଣ୍ଣିମା ଅବସରରେ ଶନିବାର ଆଠଗଡର ଆରାଧ୍ୟ ପ୍ରଭୁ ଶ୍ରୀ ଅଟ୍ଟାଳି ଜଗନ୍ନାଥଙ୍କ ମହାସ୍ନାନ ଓ ପରେ ଗଜାନନ ବେଶ ଅନୁଷ୍ଠିତ ହୋଇଯାଇଛି । ରାଜପୁରୋହିତ ସୁଶାନ୍ତ କୁମାର ମିଶ୍ର ଶ୍ରୀ ଜଗନ୍ନାଥଙ୍କର ସମସ୍ତ ନୀତିକାନ୍ତି ନିର୍ଦ୍ଧାରିତ ସମୟରେ ସମ୍ପନ୍ନ କରିଥିବାବେଳେ ଏଥିରେ ତାଙ୍କୁ ବଡପଣ୍ଡା ଶରତ କୁମାର ପଣ୍ଡା ଓ ସୁଶାନ୍ତ କୁମାର ପଣ୍ଡାଙ୍କ ସମେତ ଅନ୍ୟ ସମସ୍ତ ସେବାୟତ ସହାୟତା କରିଥିଲେ । ପ୍ରତ୍ୟୁଷରେ ଦ୍ୱାରଫିଟା, ମଙ୍ଗଳ ଆଳତୀ, ରୋଷହୋମ, ଚକାଛଡା ନୀତି ପରେ ତଡପଲାଗି ଓ ବିଜୟ ଆଳତୀ କରାଯାଇଥିଲା ।
ପରେ ପରେ ସେବାୟତମାନେ ଗୋଟି ପହଣ୍ଡିରେ ଶ୍ରୀ ଜଗନ୍ନାଥଙ୍କୁ ସ୍ନାନ ମଣ୍ଡପକୁ ବିଜେ କରାଇଥିଲେ । ସ୍ନାନ ମଣ୍ଡପରେ ଶ୍ରୀ ଜୀଉଙ୍କୁ ୧୦୮ କଳସ ଜଳରେ ମହାସ୍ନାନ ନୀତି ସମ୍ପନ୍ନ କରାଯିବା ପରେ ବାଳଭୋଗ ଓ ଆଳତୀ ସହିତ ହାତୀ ବେଶରେ ସଜ୍ଜିତ କରାଯାଇଥିଲା । ତତପରେ ଶଙ୍ଖୁଡ଼ି ଭୋଗ ଲାଗି ଓ ଆଳତୀ ସରିବା ପରେ ହାତୀ ବେଶରେ ଶ୍ରୀ ଜଗନ୍ନାଥଙ୍କୁ ସର୍ବସାଧାରଣ ଦର୍ଶନ କରିଥିଲେ ।
