ଆଠଗଡ଼: ଆଠଗଡ଼ ଏନଏସିର ୪ନମ୍ବର ୱାର୍ଡ ଅନ୍ତର୍ଗତ ହରିଜନ ସାହିରେ କୂଅରେ ପଡ଼ି ଜଣେ ଯୁବକଙ୍କ ମୃତ୍ୟୁ ହୋଇଥିବା ଜଣାପଡିଛି। ଗୁରୁବାର ବିଳମ୍ବିତ ରାତିରେ ହରିଜନ ସାହିର ଯୁବକ ସୁବାସ ନାଏକ ପ୍ରଚଣ୍ଡ ଗୁଳୁଗୁଳି ଯୋଗୁଁ ଘର ସାମ୍ନାରେ ଥିବା କୂଅ ଚାନ୍ଦିନୀ ଉପରେ ଶୋଇ ଥିଲେ। କିନ୍ତୁ କୌଣସି କାରଣ ବଶତଃ ସେହି କୂଅରେ ପଡ଼ି ଯାଇଥିଲେ। ଶବ୍ଦ ଶୁଣି ସେଠାରେ ଶୋଇଥିବା ଅନ୍ୟ ଲୋକମାନେ ଆଠଗଡ଼ ଅଗ୍ନିଶମ ବିଭାଗକୁ ଖବର ଦେଇଥିଲେ। ଖବର ପାଇ ଦମକଳ ବାହିନୀ ସୁବାସଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଆଠଗଡ଼ ଡ଼ାକ୍ତରଖାନାରେ ଭର୍ତ୍ତି କରିଥିଲେ। ଚିକିତ୍ସା ଚାଲିଥିବା ସମୟରେ ଶୁକ୍ରବାର ତାଙ୍କର ମୃତ୍ୟୁ ହୋଇଥିବା ଡାକ୍ତରଖାନା ସୂତ୍ରରୁ ଜଣାପଡିଛି। ଆଠଗଡ଼ ପୁଲିସ ମୃତଦେହ ଜବତ କରି ବ୍ୟବଚ୍ଛେଦ କରାଇବା ସହିତ ଏକ ଅପମୃତ୍ୟୁ ମାମଲା ରୁଜୁ ପରେ ତଦନ୍ତ ଆରମ୍ଭ କରିଛି।
Comments are closed.