ଆଠଗଡ : ଆଠଗଡ ଯୁବସାହିତ୍ୟ ସଂସଦ ଆନୁକୂଲ୍ୟରେ ବିଜୁ ପଟ୍ଟନାୟକ କଲ୍ୟାଣ ମଣ୍ଡପଠାରେ ରବିବାର ସନ୍ଧ୍ୟାରେ ସଭାପତି ଗଣେଶ୍ୱର ନାଏକଙ୍କ ସଭାପତିତ୍ୱରେ ପ୍ରତିଭାଧରଙ୍କୁ ପୁରସ୍କାର ବିତରଣ ଉତ୍ସଵ ଅନୁଷ୍ଠିତ ହୋଇଯାଇଛି । ଏଥିରେ କୃଷି ଓ କୃଷକ ସଶକ୍ତିକରଣ, ମତ୍ସ୍ୟ ଓ ପ୍ରାଣୀସମ୍ପଦ ବିକାଶ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ଯୋଗଦେଇ କଲେଜରେ ପାଠ ପଢୁଥିବା ଛାତ୍ରଛାତ୍ରୀଙ୍କ ମଧ୍ୟରେ ଓଡିଆ ଭାଷା ଓ ସାହିତ୍ୟ କିପରି ଅଧିକ ଆଦୃତ ହୋଇପାରିବ ଏବଂ ସେମାନଙ୍କ ମଧ୍ୟରେ ଥିବା ପ୍ରତିଭାକୁ କିପରି ବିକଶିତ କରାଯାଇ ପାରିବ ସେ ଦିଗରେ ଆଠଗଡ ଯୁବ ସାହିତ୍ୟ ସଂସଦର ଏହିପରି ଉଦ୍ୟମ ପ୍ରଶଂସନୀୟ ବୋଲି ପ୍ରକାଶ କରିଥିଲେ । ଏହି ଲକ୍ଷ୍ୟ ନେଇ ଆୟୋଜିତ ଓଡିଆ ଭାଷାଭିତ୍ତିକ ପ୍ରତିଯୋଗୀତାରେ ଆଠଗଡ ନିର୍ବାଚନମଣ୍ଡଳୀର ୧୮ଟି କଲେଜର ଶତାଧିକ ଛାତ୍ରଛାତ୍ରୀ ଭାଗ ନେବା ଉଲ୍ଲେଖଯୋଗ୍ୟ ବୋଲି ଶ୍ରୀ ସ୍ୱାଇଁ ମତବ୍ୟକ୍ତ କରିଥିଲେ । ଏଥିରେ ମୁଖ୍ୟବକ୍ତା ଭାବେ ବିଶିଷ୍ଟ ସାହିତ୍ୟିକ ପ୍ରଫେସର ଡଃ ନାରାୟଣ ପଣ୍ଡା ଯୋଗଦେଇ ଯେଉଁ ଜାତି ତାର ମାତୃଭାଷାକୁ ଭଲପାଏ ସେ ଜାତି ସେତିକି ସ୍ୱାଭିମାନୀ ଓ ଉନ୍ନତ ହୋଇଥାଏ ବୋଲି ମତପୋଷଣ କରିଥିଲେ । ସମ୍ମାନୀତ ଅତିଥି ଭାବେ ଅଧ୍ୟାପକ ଡଃ ମନୋରଞ୍ଜନ ମହାନ୍ତି ଯୋଗଦେଇ ଓଡିଆ ଭାଷାସାହିତ୍ୟର ମହାନତା ସମ୍ପର୍କରେ ଆଲୋକପାତ କରିଥିଲେ। ସେହିପରି କିଶୋର ଦାସ, ପ୍ରଭାତ ବିଶ୍ବାଳ, ଶ୍ରୁତିଧର ପ୍ରଧାନ, ସଂସଦର ଉପଦେଷ୍ଟା ଡଃ ଶରତ ଚନ୍ଦ୍ର ମାଝୀ, ସମ୍ପାଦକ ସୁଯ୍ୟ ନାରାୟଣ ବେଉରା, ନରେଶ ମହାପାତ୍ର, ପୀତବାସ ଦାସଶର୍ମା, ଆବାହକ ନିରାକାର ଲେଙ୍କା, ସହ ସମ୍ପାଦକ ବିକାଶ ଦୁଆରୀ ପ୍ରମୁଖ ଯୋଗଦେଇ ସମସ୍ତଙ୍କ ସାହାଯ୍ୟ ସହଯୋଗରେ ଯୁବ ସାହିତ୍ୟ ସଂସଦ ଆହୁରି ଆଗକୁ ଯିବାର ଏବଂ ଓଡିଆ ଭାଷା ସାହିତ୍ୟର ବିକାଶ ପାଇଁ ନିରନ୍ତର ପ୍ରୟାସ ଜାରି ରଖିବ ବୋଲି ପ୍ରକାଶ କରିଥିଲେ।
ଏହି ପୁରସ୍କାର ଉତ୍ସବରେ ୧୮ଟି କଲେଜର ପ୍ରାୟ ୧୧୦ଜଣ କୃତି ଛାତ୍ରଛାତ୍ରୀଙ୍କୁ ପୁରସ୍କୃତ କରାଯାଇଥିଲା। ଆଜି ମଧ୍ୟ ଏକ ପ୍ରତିଯୋଗିତା ଅନୁଷ୍ଠିତ ହୋଇଥିଲା ଏବଂ ଏଥିରେ କୃତିତ୍ବ ଅର୍ଜନ କରିଥିବା ଛାତ୍ରଛାତ୍ରଙ୍କୁ ସୋମବାର ବିଜୁ ପଟ୍ଟନାୟକଙ୍କ ଶ୍ରାଦ୍ଧ ଦିବସରେ ପୁରସ୍କାର ପ୍ରଦାନ କରାଯିବ ବୋଲି ସଂସଦର ଆବାହକ ନିରାକାର ଲେଙ୍କାଙ୍କ ସୂତ୍ରରୁ ପ୍ରକାଶ।
