ଭୁବନେଶ୍ବର: ଉନ୍ନୟନ ନିଗମର ତଥ୍ୟାନୁସାରେ ଓଡ଼ିଶାରେ ବିଗତ ୧୦ ବର୍ଷ ଅବଧି ଅର୍ଥାତ୍ ୨୦୧୦-୧୧ ଠାରୁ ୨୦୨୦-୨୧ ମଧ୍ୟରେ ରାଜ୍ୟର ବିଭିନ୍ନ ମହାନଗର, ସହରାଞ୍ଚଳ ଓ ଅନ୍ୟାନ୍ୟ ଅଞ୍ଚଳରେ ଶିଳ୍ପ, କଳକାରଖାନା, ଖଣିଖାଦାନ, ରାସ୍ତାଘାଟ ,ସେତୁ, ହୋଟେଲ, ପର୍ୟ୍ୟଟନ, ବନ୍ଦର, ସରକାରୀ କୋଠାବାଡ଼ି ଆଦିର ନିର୍ମାଣ ପ୍ରକଳ୍ପ ପାଇଁ ୧୬ଲକ୍ଷ ୪୫ ହଜାର ୪୧୦ ସଂଖ୍ୟକ ଗଛ କଟାଯାଇଛି ବୋଲି ଜଙ୍ଗଲ ଓ ପରିବେଶ ମନ୍ତ୍ରୀ ବିକ୍ରମ କେଶରୀ ଆରୁଖ ପ୍ରକାଶ କରିଛନ୍ତି। କେଉଁଝର ବିଧାୟକ ମୋହନ ଚରଣ ମାଝି ଆଜି ବିଧାସଭାରେ ପ୍ରଶ୍ନ କରିଥିଲେ ଯେ ଓଡ଼ିଶାରେ ଗତ ୧୦ ବର୍ଷ ଭିତରେ କେଉଁ ମହାନଗର ସମେତ ବିଭିନ୍ନ ଜିଲାରେ ଶିଳ୍ପ, କଳକାରଖାନା, ଖଣିଖାଦାନ, ରାସ୍ତାଘାଟ, ସେତୁ, ହୋଟେଲ, ପର୍ୟ୍ୟଟନ, ବନ୍ଦର, ସରକାରୀ କୋଠାବାଡ଼ି ଆଦି କେତେ ନିର୍ମାଣ ପ୍ରକଳ୍ପ ବାବଦରେ କେତେ ଗଛ କଟାଯାଇଛି। ସେ ସମ୍ପର୍କିତ ତଥ୍ୟ ପ୍ରତି ବର୍ଷଠାରୁ ପ୍ରକଳ୍ପ ଅନୁଯାୟୀ ବିଭିନ୍ନ ସହରରେ କଟାଯାଇଥିବା ଗଛଗୁଡ଼ିକର ତଥ୍ୟ ପ୍ରଦାନ କରିବାକୁ ସେ ଅନୁରୋଧ କରିଥିଲେ।
ବିଧାୟକ ମେହାନ ଚରଣ ମାଝିଙ୍କ ଏହି ପ୍ରଶ୍ନର ଉତ୍ତର ରଖିଥିଲେ ଜଙ୍ଗଲ ଓ ପରିବେଶ ମନ୍ତ୍ରୀ ବିକ୍ରମ କେଶରୀ ଆରୁଖ। ସେ କହିଥିଲେ ଯେ ରାଜ୍ୟରେ ରାସ୍ତା, ଖଣି, ସେତୁ, ହୋଟେଲ ଓ ବନ୍ଦର ନିର୍ମାଣ ପାଇଁ ଗତ ୧୦ ବର୍ଷ ଭିତରେ ୧୬ଲକ୍ଷ ୪୫ ହଜାର ୪୧୦ ଗଛ କଟାଯାଇଛି।
୧୦ ବର୍ଷ ଅବଧି ମଧ୍ୟରୁ ଗତ ୫ ବର୍ଷ ଅବଧି ଅର୍ଥାତ୍ ୨୦୧୬-୧୭ ଠାରୁ ୨୦୨୦-୨୧ ବର୍ଷ ମଧ୍ୟରେ ରାଜ୍ୟରେ ବିଭିନ୍ନ ଜିଲା ଓ ବନଖଣ୍ଡରେ ୧୫୫୭୫,୮୫୨ ହେକ୍ଟର ଚାରା ରୋପଣ, ୪୭୯,୩୫୦ ହେକ୍ଟର ଲଣ୍ଡା ପାହାଡ଼ରେ ବୃକ୍ଷରୋପଣ ଏବଂ ୧,୦୩,୪୯୬ ଚାରା ପଥପାର୍ଶ୍ବରେ/ କେନାଲ କୂଳରେ ବନୀକରଣ କରାଯାଇଅଛି । ଉକ୍ତ ପ୍ରଶ୍ନରେ ଉଲ୍ଲଖିତ ଥିବା ବୟସ ଅନୁସାରେ ବୃକ୍ଷର ମୂଲ୍ୟ ଆକଳନ କରିବା ପାଇଁ ସୁପ୍ରିମ କୋର୍ଟଙ୍କ କୌଣସି ନିର୍ଦ୍ଦେଶନାମା ହସ୍ତଗତ ହୋଇନାହିଁ ବୋଲି ଜଙ୍ଗଲ ଓ ପରିବେଶ ମନ୍ତ୍ରୀ ବିକ୍ରମ ଆରୁଖ ପ୍ରକାଶ କରିଛନ୍ତି।
