ନୂଆଦିଲ୍ଲୀ: ୟୁଏଇରେ ଚଳିତ ଅଗଷ୍ଟ ୨୭ରୁ ସେପ୍ଟେମ୍ବର ୧୧ ପର୍ଯ୍ୟନ୍ତ ଏସିଆ କପ୍ କ୍ରିକେଟ ଟୁର୍ଣ୍ଣାମେଣ୍ଟର ୧୫ଶ ସଂସ୍କରଣ ଖେଳାଯିବ। ୨୭ରେ ଉଦ୍ଘାଟନୀ ମ୍ୟାଚ ଶ୍ରୀଲଙ୍କା – ଆଫଗାନିସ୍ତାନ ମଧ୍ୟରେ ଖେଳାଯିବାବେଳେ ପ୍ରତିଯୋଗିତାର ସବୁଠାରୁ ଆକର୍ଷଣ ଦୁଇ ପାରମ୍ପରିକ ପ୍ରତିଦ୍ବନ୍ଦୀ ଭାରତ ଓ ପାକିସ୍ତାନ ୨୮ରେ ଦୁବାଇରେ ମୁହାଁମୁହିଁ ହେବେ। ପ୍ରତିଯୋଗିତାରେ ମୋଟ ୬ଟି ଦଳ ଅଂଶଗ୍ରହଣ କରିବେ। ଦଳ ଗୁଡ଼ିକୁ ଦୁଇଟି ଗ୍ରୁପରେ ବିଭକ୍ତ କରାଯାଇଛି।
ଗ୍ରୁପ-ଏ ରେ ଭାରତ ଓ ପାକିସ୍ତାନ ସମେତ ଯୋଗ୍ୟତାପର୍ଯ୍ୟାୟ ଗ୍ରୁପ-ଏ ର ଶ୍ରେଷ୍ଠ ଦଳ ରହିଛନ୍ତି। ଗ୍ରୁପ-ବି ରେ ଆଫଗାନିସ୍ତାନ, ଶ୍ରୀଲଙ୍କା ଓ ବାଂଲାଦେଶ ରହିଛନ୍ତି। ଲିଗ୍ ପର୍ଯ୍ୟାୟ ମ୍ୟାଚ ସାରଜା ଓ ଦୁବାଇରେ ସେପ୍ଟେମ୍ବର ୨ ପର୍ଯ୍ୟନ୍ତ ଖେଳାଯିବ। ଲିଗ୍ ପର୍ଯ୍ୟାୟରେ ଭାରତ ପ୍ରଥମ ମ୍ୟାଚ ପାକିସ୍ତାନ ସହିତ ଖେଳିବାବେଳେ ୩୧ରେ ଦ୍ବିତୀୟ ମ୍ୟାଚ ଯୋଗ୍ୟତାପର୍ଯ୍ୟାୟ ଦଳ ସହ ମ୍ୟାଚ ଖେଳିବ। ଦୁଇ ଗ୍ରୁପର ଶ୍ରେଷ୍ଠ ୪ ଦଳ ସୁପର-୪କୁ ଉନ୍ନୀତ ହେବେ। ସେପ୍ଟେମ୍ବର ୩ରୁ ୯ ପର୍ଯ୍ୟନ୍ତ ସୁପର-୪ ମ୍ୟାଚ ଖେଳାଯିବ।
ଏଥିରୁ ଶ୍ରେଷ୍ଠ ଦୁଇ ଦଳ ଫାଇନାଲକୁ ଉନ୍ନୀତ ହେବେ। ଫାଇନାଲରେ ସେପ୍ଟେମ୍ବର ୧୧ରେ ଦୁବାଇରେ ଖେଳାଯିବ। ଭାରତ ୨୦୧୮ରେ ଏସିଆ କପ୍ ଚମ୍ପିଆନ ଆଖ୍ୟା ଅର୍ଜନ କରିଥିଲା। ଦୁବାଇରେ ଖେଳାଯାଇଥିବା ଫାଇନାଲରେ ଭାରତ ଶେଷ ବଲରେ ବାଂଲାଦେଶକୁ ପରାସ୍ତ କରି ଚମ୍ପିଆନ ହୋଇଥିଲା। ୨୦୨୨ ଏସିଆ କପ୍ ଟ୍ବେଣ୍ଟି୨୦ କ୍ରିକେଟ ଟୁର୍ଣ୍ଣାମେଣ୍ଟ ପ୍ରଥମେ ଶ୍ରୀଲଙ୍କାରେ ଆୟୋଜିତ ହେବାର ଥିଲା। ଶ୍ରୀଲଙ୍କାେର ସୃଷ୍ଟି ହୋଇଥିବା ଆର୍ଥିକ ଅସ୍ଥିରତା ଲାଗି ପ୍ରତିଯୋଗିତାକୁ ୟୁଏଇକୁ ସ୍ଥାନାନ୍ତରିତ କରିଦିଆଯାଇଛି।
