ପାଟନା: ବିହାରରେ ବିରୋଧୀ ମହାମେଣ୍ଟ ବା ଇଣ୍ଡି ମେଣ୍ଟ ଏକଜୁଟ୍ ରହିଛି। ମେଣ୍ଟର ସହଯୋଗୀ ଦଳଗୁଡିକ ଏକାଠି ହୋଇ ବିଧାନସଭା ନିର୍ବାଚନ ଲଢୁଛନ୍ତି ବୋଲି ବରିଷ୍ଠ କଂଗ୍ରେସ ନେତା ଅଶୋକ ଗେହଲୋତ ବୁଧବାର କହିଛନ୍ତି। ଆରଜେଡି ସୁପ୍ରିମୋ ଲାଲୁ ପ୍ରସାଦ ଯାଦବ ଓ ତାଙ୍କ ପୁଅ ତେଜସ୍ବୀ ଯାଦବଙ୍କୁ ପାଟନାସ୍ଥିତ ବାସଭବନରେ ଅଶୋକ ଗେହଲୋତ ଭେଟିବା ପରେ ସାମ୍ବାଦିକଙ୍କୁ ଏପରି କହିଛନ୍ତି। ସେ କହିଛନ୍ତି ଯେ ଗୁରୁବାର ମହାମେଣ୍ଟର ଅଂଶୀଦାର ଦଳଗୁଡିକ ମିଳିତ ସାମ୍ବାଦିକ ସମ୍ମିଳନୀରେ ନିଜର ନେତା ଘୋଷଣା କରିବେ।
ମହାମେଣ୍ଟରେ ଆସନ ବୁଝାମଣା ହୋଇପାରି ନଥିବା ସମ୍ପର୍କିତ ପ୍ରଶ୍ନର ଉତ୍ତରରେ ଗେହଲୋତ କହିଛନ୍ତି ଯେ ୧୨ଟି ଆସନରେ ମେଣ୍ଟ ପକ୍ଷରୁ ଏକାଧିକ ପ୍ରାର୍ଥୀ ଦିଆଯାଇଛି। ଅଂଶୀଦାର ଦଳଗୁଡିକ ପରସ୍ପର ବିରୋଧରେ ପ୍ରାର୍ଥୀ ଦେଇଛନ୍ତି। ଏହିସବୁ ଆସନରେ ବନ୍ଧୁତ୍ବପୂର୍ଣ୍ଣ ଲଢେଇ ହେବ। କେହି କାହା ବିରୋଧରେ ପ୍ରଚାର କରିବେ ନାହିଁ। ଏକ ବଡ ମେଣ୍ଟରେ ପରସ୍ପର ମଧ୍ୟରେ ଏପରି ଲଢେଇ ହେବା କିଛି ଅସ୍ବାଭାବିକ କଥା ନୁହେଁ। ମହାମେଣ୍ଟରେ ଆସନ ବୁଝାମଣା ଅଡୁଆ ପରେ ଅଶୋକ ଗେହଲୋତ ବିହାର ଗସ୍ତ କରିଥିଲେ। ଗେହଲୋତଙ୍କ ସହିତ ବିହାର କଂଗ୍ରେସ ପ୍ରଭାରୀ କ୍ରିଷ୍ଣା ଆଲ୍ଲାଭାରୁ ଲାଲୁଙ୍କୁ ଭେଟିଥିଲେ। ବିହାର ବିଧାନସଭାର ମୋଟ ଆସନ ସଂଖ୍ୟା ୨୪୩ ହୋଇଥିବାବେଳେ ଆରଜେଡି ୧୪୩ଟି ଆସନରେ ପ୍ରାର୍ଥୀ ଦେଇଛି। ସେହିପରି କଂଗ୍ରେସ ୬୧ଟି, ବାମଦଳ ୩୩ଟି ଓ ଭିଆଇପି ୧୫ଟି ଆସନରେ ପ୍ରାର୍ଥୀ ଦେଇଛି।
