ଆରଡି: ଭଦ୍ରକ ଜିଲା ନଦୀକୂଳିଆ ଅଞ୍ଚଳଭାବେ ପରିଚିତ ଆରଡି ପଞ୍ଚାୟତର ଶୀତଳପୁର ଗାଁରେ ପ୍ରବାହିତ ହେଉଥିବା ସାଳନ୍ଦୀ ନଦୀ ଗତ ଗୁରୁବାର ରାତିରେ କୂଳ ଲଂଘିଛି। ଫଳରେ ୧ଶହ ଫୁଟର ଅସ୍ଥାୟୀ ସୁରକ୍ଷାବନ୍ଧ ନଦୀ ମଧ୍ୟକୁ ଧସିଯାଇଛି। ଏହାଦ୍ବାରା ସୁରକ୍ଷାବନ୍ଧକୁ ଲାଗି ଥିବା ୪ଟି ପରିବାର ବାବାଜି ପରିଡା, ନିରାକାର ପରିଡା, ଆନନ୍ଦ ଜେନା ପ୍ରମୁଖଙ୍କ ଘରର ଭୂସ୍ଖଳନ ଘଟି ଅଣ୍ଟାଏ ଉଚ୍ଚରୁ ଚଟାଣ ନଦୀକୁ ଆଡକୁ ଢଳିଯିବା ସହ କାନ୍ଥ ଓ ଛପର ଘରରେ ବଡବଡ ଫାଟ ସୃଷ୍ଟି ହୋଇଛି। ପରିବାର ଲୋକ ପର ଘରେ ମୁଣ୍ଡ ଗୁଞ୍ଜିଛନ୍ତି। ଏପରି ଘଟଣା ଘଟିବାର ୫ଦିନ ବିତିଯାଇଥିଲେ ମଧ୍ୟ ମରାମତି ହେବାତ ଦୂରର କଥା ଜଳସେଚନ ବିଭାଗୀୟ ଅଧିକାରୀ ଏପର୍ଯ୍ୟନ୍ତ ଘଟଣାସ୍ଥଳରେ ପହଞ୍ଚିଲେ ନାହିଁ। ଯାହାକୁ ନେଇ ଗାଁ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି।
ବିଶେଷକରି ନଦୀରେ କୁମ୍ଭୀର ରହିଥିବାରୁ ସାମାନ୍ୟ ଜୁଆରପାଣି ଆସିଲେ ଗାଁ ଦାଣ୍ଡରେ ଲହଡି ଭାଙ୍ଗୁଛି ଏବଂ ନଦୀରୁ କୁମ୍ଭୀର ଖାଦ୍ୟ ଅନ୍ବେଷଣରେ ସୁରକ୍ଷାବନ୍ଧ ଉପରେ ଶୋଇ ରହୁଛି। ଭୟରେ ଗାଁ ଲୋକ ଯାତାୟତ କରିପାରୁନଥିବା ଋଷିରାମ ଜେନା, ରକ୍ଷାକର ବିଶ୍ବାଳ, ପ୍ରଦୀପ ବିଶ୍ବାଳ ପ୍ରମୁଖ କହିଛନ୍ତି। ସେହିପରି ଏହି ବନ୍ଧରାସ୍ତା ଉପରେ ପ୍ରାଥମିକ ସ୍କୁଲର ଛାତ୍ରଛାତ୍ରୀ ପ୍ରତିଦିନ ଯାଆ ଆସ କରିଥାନ୍ତି। ଏବେ ସୁରକ୍ଷାବନ୍ଧ ଢଳି ରହିବା ସହ ବିପଦ ଥିବାରୁ ଗାଁ ଲୋକ କୁମ୍ଭୀର ଭୟରେ ପିଲାଙ୍କୁ ବିଦ୍ୟାଳୟକୁ ଛାଡିବେ ନାହିଁ ବୋଲି ନିଷ୍ପତ୍ତି ନେଇଛନ୍ତି।
