ବାର୍ସିଲୋନା: ସମସ୍ତଙ୍କୁ ଘାରିଛି କରୋନା ଭୟ। ଏଥିରୁ ବାଦ୍ ପଡ଼ିନାହାନ୍ତି ବିଶ୍ଵର ସବୁଠୁ ଦାମୀ ଫୁଟବଲ୍ ଖେଳାଳି ଲିଓନେଲ୍ ମେସୀ। ତେବେ ସେ କରୋନାରୁ ବର୍ତ୍ତିବା ଲାଗି ଏକ ସ୍ବତନ୍ତ୍ର ଉପାୟ ଆପଣାଇଛନ୍ତି। ନିଜେ ଏବଂ ପରିବାର ଲୋକଙ୍କୁ କରୋନା ଭୂତାଣୁଠାରୁ ରକ୍ଷା କରିବା ପାଇଁ ସେ ଏକ କରୋନା ନିରୋଧୀ ଗଦି ବ୍ୟବହାର କରୁଛନ୍ତି।
ମେସୀ ବ୍ୟବହାର କରୁଥିବା ଏହି କରୋନା ଭୂତାଣୁ ନିରୋଧୀ ଗଦିର ମୂଲ୍ୟ ପ୍ରାୟ ୮୮ ହଜାର ଟଙ୍କା। ରିପୋର୍ଟ ଅନୁସାରେ ଏହି ଗଦି କରୋନା ଭୂତାଣୁକୁ ୪ ଘଣ୍ଟାରେ ମାରିଦେଇଥାଏ। ଟେକ୍ ମୁନ୍ସ ନାମକ କମ୍ପାନୀ ଏହି ଗଦି ପ୍ରସ୍ତୁତ କରିଛି। ସ୍ପେନ୍ର କେତେକ ଗଣମାଧ୍ୟମ ରିପୋର୍ଟ ଅନୁସାରେ, ମେସି ଟେକ୍ ମୁନ୍ସ କୋଭିଡ-୧୯ ଗଦିର ବ୍ୟବହାର କରୁଛନ୍ତି। ଆଟଲେଟିକୋ ମାଡ୍ରିଡ୍ର ଶାଉଲ ନିଗୁଏଜ୍ କମ୍ପାନୀର ବ୍ରାଣ୍ଡ ଆମ୍ବାସାଡର ଅଛନ୍ତି। ତେବେ କେବଳ ମେସି ନୁହନ୍ତି, ତାଙ୍କ ଟିମ୍ ସାଥୀ ସର୍ଗିଓ ଆଗୁରୋ ମଧ୍ୟ ଏହି ଗଦି ବ୍ୟବହାର କରୁଛନ୍ତି। କମ୍ପାନୀର ଦାବି ଅନୁସାରେ, ଏହି ଗଦିରେ ଶୋଇବା ପରେ ୪ ଘଣ୍ଟା ଭିତରେ ମଣିଷ ଶରୀରରେ ଥିବା କରୋନା ଭୂତାଣୁ ମରିଯିବ। ଏହି ଗଦିରେ ‘ଭାଇରୁକ୍ଲିନ’ ନାମକ ଏକ ସିଷ୍ଟମ ରହିଛି। ଏହି ସିଷ୍ଟମ ଟିସୁର ନାନୋ ପାର୍ଟିକିଲ୍ସ ଜରିଆରେ ମଣିଷ ଶରୀରରୁ ୯୯% ଭାଇରସ ଏବଂ କ୍ଷତିକାରକ ବ୍ୟାକ୍ଟେରିଆକୁ ମାରିଦେଇଥାଏ। ବର୍ତ୍ତମାନ ଫୁଟବଲ୍ ମ୍ୟାଚ୍ ଜାରି ରହିଥିବାରୁ ବିଶ୍ଵର ସମସ୍ତ ଫୁଟ୍ବଲ କ୍ଲବର ସଦସ୍ୟ, ଖେଳାଳି ଓ ଅନ୍ୟ କର୍ମକର୍ତ୍ତାମାନଙ୍କର ନିୟମିତ ବ୍ୟବଧାନରେ କରୋନା ଯାଞ୍ଚ କରାଯାଉଛି। କିନ୍ତୁ ମେସି ନିଜକୁ ଓ ତାଙ୍କ ପରିବାରକୁ ସୁରକ୍ଷିତ ରଖିବା ଲାଗି ଆଉ ପାଦେ ଆଗକୁ ଯାଇ କରୋନା ନିରୋଧୀ ଗଦି ବ୍ୟବହାର କରୁଛନ୍ତି।
