ଇନ୍ଦୋର: ମଧ୍ୟପ୍ରଦେଶର ଇନ୍ଦୋରରେ କରୋନା ଭୂତାଣୁ ଯୋଗୁ ଆଉ ଜଣେ ଥାନା ଅଧିକାରୀଙ୍କ ଜୀବନ ଯାଇଛି। କରୋନା ପ୍ରଭାବିତ ଅଞ୍ଚଳରେ ଡ୍ୟୁଟିରେ ଥିବା ସମୟରେ ସେ କରୋନାରେ ସଂକ୍ରମିତ ହୋଇଥିଲେ। ତାଙ୍କ ନାମ ଯଶୱନ୍ତ ପାଲ। ସେ ନୀଲଗଙ୍ଗା ଥାନାର ଟିଆଇ ଭାବେ କାର୍ଯ୍ୟ କରୁଥିଲେ। ତାଙ୍କ ପରିବାର ଲୋକଙ୍କଠାରେ କରୋନା ଭୂତାଣୁ ଠାବ ହୋଇନାହିଁ। ନୀଲଗଙ୍ଗା ଥାନା ଅଧୀନ ଅମ୍ବଲ କଲୋନୀରେ ଗତ ମାର୍ଚ୍ଚ ୨୭ରେ ଜଣେ ଯୁବକ କରୋନା ଭୂତାଣୁରେ ସଂକ୍ରମିତ ହୋଇଥିଲେ। ଏହା ପରେ ଉକ୍ତ ଅଞ୍ଚଳକୁ କଣ୍ଟେନମେଣ୍ଟ ଜୋନ ଘୋଷଣା କରାଯାଇଥିଲା। ସେହି ଅଞ୍ଚଳରେ ପାଲ୍ ଡ୍ୟୁଟିରେ ଥିଲେ। ଏହି ସମୟରେ ସେ କରୋନାରେ ସଂକ୍ରମିତ ହୋଇଥିଲେ। ଏହା ପରେ ତାଙ୍କ ସ୍ବାସ୍ଥ୍ୟାବସ୍ଥା ଖରାପ ହୋଇଯାଇଥିଲା। ଇନ୍ଦୋରର ଅରୋବିନ୍ଦ ହସ୍ପିଟାଲରେ ତାଙ୍କର ଚିକିତ୍ସା ଚାଲିଥିବାବେଳେ ମଙ୍ଗଳବାର ଭୋର ପ୍ରାୟ ୫ଟା ୧୦ରେ ତାଙ୍କର ମୃତ୍ୟୁ ଘଟିଛି। ଇନ୍ଦୋରର ବିଜୟ ନଗରରେ ତାଙ୍କ ପରିବାର ରୁହନ୍ତି। ତାଙ୍କର ପତ୍ନୀ ଏବଂ ୨ ଝିଅ ଅଛନ୍ତି।
ସୂଚନାଯୋଗ୍ୟ, ଗତ ରବିବାର ଇନ୍ଦୋରରେ ଜଣେ ଇନ୍ସପେକ୍ଟରଙ୍କର କରାନାରେ ମୃତ୍ୟୁ ଘଟିଥିଲା। ରାଜ୍ୟ ସରକାରଙ୍କ ପକ୍ଷରୁ ତାଙ୍କ ପରିବାରକୁ ୫୦ ଲକ୍ଷ ଟଙ୍କା ଏବଂ ପତ୍ନୀଙ୍କୁ ଏସଆଇ ଚାକିରି ଦେବାକୁ ଘୋଷଣା କରାଯାଇଥିଲା।
Comments are closed.