ପାଟନା : ବିହାରର ପୂର୍ବତନ ମୁଖ୍ୟମନ୍ତ୍ରୀ ଜଗନ୍ନାଥ ମିଶ୍ରଙ୍କ ଅେନ୍ତ୍ୟଷ୍ଟି ସମୟରେ ବଡ଼ ଅଘଟଣ ଘଟିଛି। ରାଷ୍ଟ୍ରୀୟ ସମ୍ମାନ ସ୍ବରୂପ ପୁଲିସ ପକ୍ଷରୁ ତୋପସଲାମି ଦିଆଯିବାକୁ ସମସ୍ତ ବ୍ୟବସ୍ଥା ହୋଇଥିଲାବେଳେ ମୋଟ ୨୨ଟି ମଧ୍ୟରୁ କୌଣସି ଗୋଟିଏ ବନ୍ଧୁକରୁ ଗୁଳି ଫୁଟି ନ ଥିବା ଅପ୍ରୀତିକର ପରିସ୍ଥିତି ସୃଷ୍ଟି କରିଛି। ଏଥିରେ କେବଳ ସରକାର ନିନ୍ଦିତ ହୋଇ ନାହାନ୍ତି; ବରଂ ପୁଲିସ ବିଭାଗର ପ୍ରସ୍ତୂତିକୁ ନେଇ ପ୍ରଶ୍ନ ଉଠିଛି।
ଜଗନ୍ନାଥଙ୍କ ଦେହାନ୍ତ ୧୯ତାରିଖରେ ହୋଇଥିଲା। ବୁଧବାର ତାଙ୍କର ଶେଷକୃତ୍ୟ ସୁପାଉଲ ଜିଲା ଅଧୀନ ତାଙ୍କ ପୈତୃକ ଗ୍ରାମରେ ଅନୁଷ୍ଠିତ ହେଉଥିଲା। ଏହି କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ସହ ତାଙ୍କ ମନ୍ତ୍ରିମଣ୍ଡଳ ସଦସ୍ୟ ଓ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ। ଏହି ସମୟରେ ପୁଲିସ ପକ୍ଷରୁ ତୋପସଲାମି ଦିଆଯିବାକୁ ଥିଲାବେଳେ ୨୨ଟି ମଧ୍ୟରୁ କୌଣସି ଗୋଟିଏ ବି ବନ୍ଧୁକରୁ ଗୁଳି ଫୁଟି ନ ଥିଲା। ସମ୍ପୃକ୍ତ ପୁଲିସ କର୍ମଚାରୀ ବାରମ୍ବାର ବନ୍ଧୁକର ପରୀକ୍ଷାନିରୀକ୍ଷା କରିଥିଲେ ମଧ୍ୟ ସୁଫଳ ମିଳି ନ ଥିଲା। ପରେ ବିନା ତୋପସଲାମିରେ ଶେଷକୃତ୍ୟ ସମ୍ପନ୍ନ ହୋଇଥିଲା। ହେଲିକପ୍ଟରରେ ଯାଇଥିବା ନୀତୀଶ ବିରକ୍ତି ପ୍ରକାଶ ପୂର୍ବକୁ ଶୀଘ୍ର ଫେରିଆସିଥିଲେ। ଘଟଣାରେ ପ୍ରତିକ୍ରିୟା ପ୍ରକାଶ କରି ଆରଜେଡି ବିଧାୟକ ଯଦୁବଂଶ କୁମାର ଯାଦବ ଏହାକୁ ଦୁର୍ଭାଗ୍ୟପୂର୍ଣ୍ଣ ଦର୍ଶାଇବା ସହ ତଦନ୍ତ ଦାବି କରିଛନ୍ତି।
