ଇସଲାମାବାଦ: ପାକିସ୍ତାନରେ ବନ୍ଦୀ ଜୀବନ ବିତାଉଥିବା ଭାରତର ପୂର୍ବତନ ନୌସେନା ଅଧିକାରୀ କୁଳଭୂଷଣ ଯାଦବଙ୍କୁ ପାକିସ୍ତାନ ମୃତ୍ୟୁଦଣ୍ଡ ଦେଇପାରିବ ନାହିଁ ବୋଲି ଅନ୍ତର୍ଜାତୀୟ ନ୍ୟାୟିକ କୋର୍ଟ(ଆଇସିଜେ) ବୁଧବାର ରାୟ ଦେଇଛନ୍ତି। ତେବେ ଏହି ନିଷ୍ପତ୍ତିକୁ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ ପ୍ରଶଂସା କରିଛନ୍ତି। ଇମ୍ରାନ କହିଛନ୍ତି, କୁଳଭୂଷଣ ଯାଦବଙ୍କୁ ଦୋଷମୁକ୍ତ ନ କରିବା ଏବଂ ଭାରତକୁ ନ ଫେରାଇବା ଲାଗି ଆଇସିଜେର ନିଷ୍ପତ୍ତିକୁ ପ୍ରଶଂସା କରୁଛି। ସେ ପାକିସ୍ତାନର ଲୋକଙ୍କ ବିରୋଧରେ ଆପରାଧିକ କାର୍ଯ୍ୟ କରିଥିବାରୁ ଦୋଷୀ ସାବ୍ୟସ୍ତ ହୋଇଛନ୍ତି। ପାକିସ୍ତାନ ଆଇନ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ଇମ୍ରାନ ଟ୍ବିଟରରେ ଉଲ୍ଲେଖ କରିଛନ୍ତି।
ଗୁପ୍ତଚରଗିରି କରିବା ଅଭିଯୋଗରେ କୁଳଭୂଷଣ ଗିରଫ ହୋଇଥିବାବେଳେ ପାକିସ୍ତାନର ଏକ କୋର୍ଟ ତାଙ୍କୁ ମୃତ୍ୟୁ ଦଣ୍ଡାଦେଶ ଦେଇଛନ୍ତି। ଭାରତ ଏହାକୁ ଆଇସିଜେରେ ଚ୍ୟାଲେଞ୍ଜ କରିଛି। ଗତ ବୁଧବାର ଆଇସିଜେ ଏହି ମାମଲାର ଶୁଣାଣି କରି ପାକିସ୍ତାନ କୁଳଭୂଷଣଙ୍କୁ ମୃତ୍ୟୁଦଣ୍ଡ ଦେଇପାରିବ ନାହିଁ ବୋଲି ରାୟ ପ୍ରକାଶ କରିଥିଲେ। ପାକିସ୍ତାନ ନିୟ ରାୟର ସମୀକ୍ଷା କରିବାକୁ ଆଇସିଜେ ନିର୍ଦେଶ ଦେଇଥିଲେ। ଫଳରେ ଏହି ମାମଲା ଭାରତର ବୃହତ୍ ବିଜୟ ହୋଇଥିଲା।
