ନୂଆଦିଲ୍ଲୀ: ଜାମ୍ମୁ-କାଶ୍ମୀରରେ ଆତଙ୍କବାଦୀ ସଂଗଠନଗୁଡ଼ିକୁ ପାଣ୍ଠି ଯୋଗାଇବା ମାମଲାରେ ଗିରଫ ହୋଇଥିବା ବିଚ୍ଛିନ୍ନତାବାଦୀ ତଥା ଦୁଖତରାନ-ଏ-ମିଲତ ମୁଖ୍ୟ ଆସିୟା ଅନ୍ଦ୍ରାବୀଙ୍କ ଘରକୁ ସିଲ୍ କରିଦେଇଛି ଜାତୀୟ ତଦନ୍ତକାରୀ ସଂସ୍ଥା(ଏନଆଇଏ)। ତଦନ୍ତ ଶେଷ ନ ହେବା ଯାଏ ଅନ୍ଦ୍ରାବୀ ଉକ୍ତ ଘରକୁ ବିକ୍ରି କରିପାରିବେ ନାହିଁ କି କୌଣସି ବ୍ୟବସାୟିକ କାର୍ଯ୍ୟରେ ବ୍ୟବହାର କରିପାରିବେ ନାହିଁ। ଏହି ସମୟରେ ସେ ଯଦି ଜେଲରୁ ମୁକୁଳନ୍ତି, ତେବେ ତାଙ୍କୁ ସେହି ଘରେ ରହିବାରେ କୌଣସି ପ୍ରତିବନ୍ଧକ ରହିବ ନାହିଁ।
ଏନଆଇଏର ଜେରା ସମୟରେ ଅନ୍ଦ୍ରାବୀ ସ୍ବୀକାର କରିଥିଲେ ଯେ, ସେ ବିଦେଶରୁ ଚାନ୍ଦା ସଂଗ୍ରହ କରି କାଶ୍ମୀରରେ ବିରୋଧ ପ୍ରଦର୍ଶନ ପାଇଁ ମହିଳାଙ୍କ ପଛରେ ଖର୍ଚ୍ଚ କରୁଥିଲେ। ଆତଙ୍କବାଦୀ ହଫିଜ ସୟିଦଙ୍କ ନିର୍ଦେଶରେ ସେ ସୁରକ୍ଷା କର୍ମୀଙ୍କ ଉପରେ ପଥରମାଡ଼ କରୁଥିବା ନେଇ ମଧ୍ୟ ଅଭିଯୋଗ ରହିଛି। କାଶ୍ମୀର ବିଶ୍ଵବିଦ୍ୟାଳୟରୁ ବିଜ୍ଞାନରେ ସ୍ନାତକ ପାସ୍ କରିଥିବା ଅନ୍ଦ୍ରାବୀ ୪ବର୍ଷ ତଳେ ପାକିସ୍ତାନୀ ପତାକା ଉଡ଼ାଇବା ସହିତ ପାକିସ୍ତାନୀ ଜାତୀୟ ସଙ୍ଗୀନ ଗାନ କରି ଚର୍ଚ୍ଚାକୁ ଆସିଥିଲେ। ତାଙ୍କର ଦୁଇ ପୁଅଙ୍କ ମଧ୍ୟରୁ ଜଣେ ମାଲେସିଆରେ ଥିବାବେଳେ ଅନ୍ୟ ଜଣେ ଅଷ୍ଟ୍ରେଲିଆରେ ରହୁଛନ୍ତି।
