ନୂଆଦିଲ୍ଲୀ: ପ୍ରଧାନମନ୍ତ୍ରୀ ଭାବେ ଦ୍ଵିତୀୟ ଥର ଦାୟିତ୍ୱ ଗ୍ରହଣ କରିବାକୁ ଯାଉଥିବା ନରେନ୍ଦ୍ର ମୋଦୀ ଶନିବାର କହିଛନ୍ତି, ତାଙ୍କ ସରକାର ଅଫୁରନ୍ତ ଶକ୍ତି ସହ ନବ ଭାରତ ଗଠନ ଦିଗରେ କାର୍ଯ୍ୟ କରିବ। ଜାତୀୟ ଗଣତାନ୍ତ୍ରିକ ମେଣ୍ଟ ସଦସ୍ୟମାନଙ୍କୁ ବିନା ଭେଦ ଭାବରେ କାର୍ଯ୍ୟ କରିବାକୁ ମୋଦୀ ପରାମର୍ଶ ଦେଇଛନ୍ତି। ପ୍ରାୟ ୭୫ ମିନିଟ କାଳ ମେଣ୍ଟର ନିର୍ବାଚିତ ସଦସ୍ୟ ମାନଙ୍କୁ ଉଦବୋଧନ ଦେବା ଅବସରରେ ନରେନ୍ଦ୍ର ମୋଦୀ କହିଛନ୍ତି, ଭୋଟ ବ୍ୟାଙ୍କ ରାଜନୀତି କେବେ ଦେଶର ଉପକାର କରେ ନାହିଁ ତେଣୁ ସମସ୍ତଙ୍କୁ ନେଇ ସମସ୍ତଙ୍କ ବିକାଶ ଦିଗରେ କାର୍ଯ୍ୟ କରିବାକୁ ହେବ।
ସେ କହିଛନ୍ତି ଯେ କ୍ଷମତାରେ ରହି ଲୋକମାନଙ୍କ ସେବା କରିବା ଭଳି ଅନ୍ୟ କୌଣସି ଭଲ ରାସ୍ତା ନାହିଁ। ସଂସଦର କେନ୍ଦ୍ରୀୟ କକ୍ଷରେ ଶନିବାର ଅପରାହ୍ନରେ ବିଜେପିର ବରିଷ୍ଠ ନେତା ନରେନ୍ଦ୍ର ମୋଦୀ କହିଛନ୍ତି ଯେ ଯେଉଁମାନେ ଆମ ଉପରେ ଭରସା କରିଛନ୍ତି ସେମାନଙ୍କ ପାଇଁ ଏବଂ ଯେଉଁମାନେ ଭରସା କରିନାହାନ୍ତି ଆମକୁ ସେମାନଙ୍କ ବିଶ୍ୱାସ ଜିତିବାକୁ ପଡିବ। ଏହି ଅବସରରେ ମୋଦୀ ସାଂସଦମାନଙ୍କୁ ଭିଆଇପି ସଂସ୍କୃତି ତ୍ୟାଗ କରିବାକୁ ଆହ୍ୱାନ ଦେଇଛନ୍ତି। ଆବଶ୍ୟକ ପଡିଲେ ସାଂସଦ ବି ସାଧାରଣ ଲୋକ ଭଳି ଧାଡିରେ ଛିଡା ହେବା ଉଚିତ ବୋଲି ମୋଦୀ କହିଛନ୍ତି।
ମନ୍ତ୍ରୀ ପରିଷଦରେ କିଏ ରହିବ କିଏ ନ ରହିବ, ସେ ନେଇ ଚାଲିଥିବା ଅନୁମାନରେ ପୂର୍ଣ୍ଣଛେଦ ପକାଇ ମୋଦୀ କହିଛନ୍ତି ଯେ ନିୟମ ଅନୁଯାୟୀ ଦାଇତ୍ୱ ଦିଆଯିବ। ସେ କହିଛନ୍ତି ଯେ ନିର୍ବାଚନ ଦୂରତ୍ୱ ସୃଷ୍ଟି କରେ କିନ୍ତୁ ୨୦୧୯ ନିର୍ବାଚନ ସମାଜ ଓ ଲୋକଙ୍କୁ ଯୋଡିବା କାର୍ଯ୍ୟ କରିଛି। ନେତାମାନେ ଗଣମାଧ୍ୟମ ସହ କଥାବାର୍ତ୍ତା ବେଳେ ସଂଯମତା ଅବଲମ୍ବନ କରିବାକୁ କହିଛନ୍ତି। ମୋଦୀ କହିଛନ୍ତି, ୨୦୧୪ରୁ ୨୦୧୯ ପର୍ଯ୍ୟନ୍ତ ଗରିବଙ୍କ ପାଇଁ ସରକାର ଥିଲା କିନ୍ତୁ ଏବେ ଗରିବମାନେ ହିଁ ସରକାର ଚୟନ କରିଛନ୍ତି।
