ଧାମରା: ବିଜେଡିର ପୂର୍ବତନ ବ୍ଲକ ସଭାପତି ତଥା ବିଜେଡି ଜିଲ୍ଲା ଉପସଭାପତି ପ୍ରତାପଚନ୍ଦ୍ର ଧଳ ଶୁକ୍ରବାର ବିଜୁ ଜନତା ଦଳର ପ୍ରାଥମିକ ସଦସ୍ୟରୁ ଇସ୍ତଫା ଦେଇଛନ୍ତି। ଦଳର ସୁପ୍ରିମୋ ନବୀନ ପଟନାୟକଙ୍କୁ ସେ ଏହି ଇସ୍ତଫା ପତ୍ର ପଠାଇଥିବା ଏକ ସାମ୍ବାଦିକ ସମ୍ମିଳନୀରେ କହିଛନ୍ତି। ସ୍ଥାନୀୟ ଯଶୀପୁର ପଞ୍ଚାୟତର ବାରାକୋଲହ୍ ଠାରେ ୪୫ଟି ପଞ୍ଚାୟତର ସମର୍ଥକ, କର୍ମୀ ଏବଂ ଆଗ ଧାଡିର ନେତୃବୃନ୍ଦକୁ ନେଇ ଏକ ଚିନ୍ତନ ବୈଠକ ଅନୁଷ୍ଠିତ ହୋଇଥିଲା। ଏଥିରେ ୪ହଜାରରୁ ଉର୍ଦ୍ଧ୍ୱ କର୍ମୀ ଏବଂ ବହୁ ସମର୍ଥକ ଯୋଗ ଦେଇଥିବା ବେଳେ ବିଧାୟକ ବ୍ୟୋମକେଶ ରାୟଙ୍କ ଉପରେ ବର୍ଷିଥିଲେ। ମୁଖ୍ୟମନ୍ତ୍ରୀଙ୍କ ଗସ୍ତ ସମୟରେ କେତକ ଅସାମଜିକ ବ୍ୟକ୍ତି ତଥା ବିଧାୟକଙ୍କ ସମର୍ଥକ ମହିଳାମାନଙ୍କ ଆକ୍ରମଣ କଥାକୁ ନେଇ ସେ ମୁଖ୍ୟମନ୍ତ୍ରୀଙ୍କ ଦପ୍ତରରେ ଅଭିଯୋଗ କରିଥିଲେ। ମାତ୍ର ଦଳର ସୁପ୍ରିମୋ ଏ ବିଷୟରେ କିଛି ପଦକ୍ଷେପ ନେବା ପରିବର୍ତ୍ତେ ପୁନଶ୍ଚ ବ୍ୟୋମକେଶଙ୍କୁ ଟିକେଟ ପ୍ରଦାନ କରିଥିବାରୁ ସେ ଏଥିରେ କ୍ଷୋଭ ପ୍ରକାଶ କରିବା ସହ ତାଙ୍କର ୪ହଜାରରୁ ଉର୍ଦ୍ଧ ସମର୍ଥକଙ୍କ ସହ ଇସ୍ତଫା ପ୍ରଦାନ କରିଛନ୍ତି। ତେବେ ସେ ନିଜର ସମର୍ଥକଙ୍କ ସହ କେଉଁ ଦଳକୁ ଯିବେ ଅଥବା ଅନ୍ୟ ଦଳକୁ ସମର୍ଥନ କରିବେ ସେ ଏ ନେଇ ନିଜ ପ୍ରତିକ୍ରିୟା ରେ କହିଛନ୍ତି ଯେ ଏ ସମ୍ପର୍କରେ ନିଷ୍ପତ୍ତି ନେବା ପାଇଁ ଏକ ୫୧ଜଣିଆ କମିଟି ଗଠନ କରାଯାଇଛି। ଏହି କମିଟି ନିଷ୍ପତ୍ତି ଅନୁଯାୟୀ ସେ ଆଗାମୀ ଦିନରେ ନିଷ୍ପତ୍ତି ନେବେ।
