ମୁମ୍ବଇ : ଡାନ୍ସବାରରେ ନର୍ତ୍ତକୀଙ୍କ ଉପରକୁ ଟଙ୍କା ଉଡାଇବା ଅଭିଯୋଗରେ ଗିରଫ ହୋଇଥିବା ଅଭିଯୁକ୍ତଙ୍କ ପାଇଁ ଏକ ଅଭିନବ ସର୍ତ୍ତ ଲାଗୁ ହୋଇଛି । ସେମାନଙ୍କ ଜାମିନ ବଦଳରେ ଅନାଥ ଶିଶୁଙ୍କୁ ୩ ହଜାର ଟଙ୍କା ଦେବାକୁ ସିଟିକୋର୍ଟ ନିର୍ଦେଶ ଦେଇଛନ୍ତି । ସମ୍ଭବତଃ ଏଭଳି ଶୁଣାଣି ଦେଶରେ ପ୍ରଥମ ବୋଲି ଜଣାପଡିଛି ।
ସୂଚନାଯୋଗ୍ୟ, ମହାରାଷ୍ଟ୍ରରର ମୁମ୍ବାଇର ହାଜି ଅଲି ନିକଟରେ ଥିବା ଏକ ଡାନ୍ସବାରରେ ରବିବାର ପୁଲିସ ଚଢଉ କରିଥିଲା। ଚଢଉ ବେଳେ ନର୍ତ୍ତକୀଙ୍କ ଉପରକୁ ଟଙ୍କା ଉଡାଉ ଥିବା ୪୭ ଜଣଙ୍କୁ ମୁମ୍ବଇ ପୁଲିସ ଗିରଫ କରିଥିଲା । ସେମାନଙ୍କ ଜାମିନ ପାଇଁ ବଦଲପୁରର ପ୍ରତ୍ୟେକ ଅନାଥ ଶିଶୁଙ୍କୁ ଅଭିଯୁକ୍ତମାନେ ୩ ହଜାର ଟଙ୍କା ଦାନ କରିବେ ବୋଲି ସିଟି କୋର୍ଟ ରାୟ ଶୁଣାଇଛନ୍ତି । ସିଟି କୋର୍ଟର ଏଭଳି ଆଦେଶ ପରେ ଥାନାରେ ୧.୪୧ ଲକ୍ଷ ଟଙ୍କା ଜୋରିମାନ ଭାବେ ପୈଠ କରିବା ପାଇଁ ପୁଲିସ କହିଛି । ଏହି ଅର୍ଥକୁ ବଦଲାପୁର ସ୍ଥିତ ସତ୍କର୍ମ ବାଳକ ଆଶ୍ରମରେ ଥିବା ଶିଶୁଙ୍କୁ ଦାନ କରାଯିବ ବୋଲି ସୂଚନା ମିଳିଛି ।
