ରାୟଗଡ଼ା: ଡିସେମ୍ବର ୨ରୁ ୮ ତାରିଖ ପର୍ଯ୍ୟନ୍ତ ମାଓ ସଂଗଠନ ପକ୍ଷରୁ ପିଏଲଜିଏ ସପ୍ତାହ ପାଳନ କରାଯାଉଛି। ଏହି ପରିପ୍ରେକ୍ଷୀରେ ରାୟଗଡ଼ା ଜିଲା ସୀମାନ୍ତ କେରେଡାଠାରେ କେନ୍ଦ୍ରୀୟ ସୁରକ୍ଷା ବାହିନୀ ତରଫରୁ ଗାଡି ତନଖିକୁ ଜୋରଦାର କରାଯାଇଛି। ରାୟଗଡ଼ା ସୀମାରୁ ଯାଉଥିବା ପ୍ରତ୍ୟେକ ଗାଡ଼ିର କାଗଜପତ୍ର ତନ୍ନତନ୍ନ ଯାଞ୍ଚ କରାଯାଉଛି। କିଛିବର୍ଷ ତଳେ ଇରୁକୁବାଡ଼ି ପଞ୍ଚାୟତର ମାଓଗେଣ୍ଡା ପାହାଡ଼ରେ ସୁରକ୍ଷା କର୍ମୀ ଓ ମାଓବାଦୀଙ୍କ ମଧ୍ୟରେ ହୋଇଥିବା ଗୁଳି ବିନିମୟରେ ୪ରୁ ଅଧିକ ଆନ୍ଧ୍ର ମାଓବାଦୀ ପ୍ରାଣ ହରାଇଥିଲେ।
ସୀମାନ୍ତ ଆନ୍ଧ୍ରର ଅନେକ ଗ୍ରାମ ରାୟଗଡ଼ା ଜିଲାକୁ ଘେରି ରହିଛି। ତିନିବର୍ଷ ହେଲା ଆନ୍ଧ୍ରର ଗାଇପକା, କୁଣ୍ଟେଶୁ, ରଚାପଖା ଆଦି ଅଞ୍ଚଳରେ ମାଓବାଦୀଙ୍କ ଗତିବିଧି ଉପରେ କେନ୍ଦ୍ରୀୟ ସୁରକ୍ଷା ବାହିନୀ ନଜର ରଖିଛି। ସରକାରଙ୍କ ନିର୍ଦେଶ ଅନୁସାରେ ଏହି ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ ଅଧିକ କଡ଼ାକଡ଼ି କରାଯାଇଛି ବୋଲି କେନ୍ଦ୍ରୀୟ ସୁରକ୍ଷା ବାହିନୀ ଅଧିକାରୀ କ୍ଷେତ୍ରପାଲ ସିଂ କହିଛନ୍ତି।
