ପୁରୀ: ମହାପ୍ରଭୁ ଶ୍ରୀଜଗନ୍ନାଥଙ୍କ କରୁଣା ଆଗରେ ପୁଣି ଥରେ ଚିକିତ୍ସା ବିଜ୍ଞାନ ବିଫଳ ହୋଇଛି। ରଖେ ହରି ତ ମାରେ କିଏ ବୋଲି ଜଣେ ବାପା ନିଜ ଅସୁସ୍ଥ ପୁଅକୁ ଧରି ଶ୍ରୀମନ୍ଦିର ସାମ୍ନାରେ ଶନିବାର ଭାବବିହ୍ବଳ ହୋଇ କହିଛନ୍ତି। ମହାପ୍ରଭୁଙ୍କ ଆଶୀର୍ବାଦରୁ ତାଙ୍କ ପୁଅ ଧୀରେ ଧୀରେ ସୁସ୍ଥ ହେଉଛି। ଯେଉଁ ଅସୁସ୍ଥ ପୁଅର ଗୋଡ଼ ହାତ ଚାଲୁ ନଥିଲା, ବର୍ତ୍ତମାନ ଗୋଡ଼ ହାତ ଚାଲିବା ସହ କଥା ମଧ୍ୟ ଶୁଣୁଛି ବୋଲି ତା’ର ବାପା ସିଂହଦ୍ବାର ନିକଟରେ କହିଛନ୍ତି।
ପ୍ରକାଶଯୋଗ୍ୟ, ନିଜ ପୁଅର ଅସୁସ୍ଥତା ନେଇ ସବୁଠାରୁ ନିରାଶ ହେବା ପରେ ଚଳିତ ମାସ ୮ ତାରିଖ ସକାଳେ ସେ ଶ୍ରୀଜଗନ୍ନାଥଙ୍କ ଦ୍ବାରସ୍ଥ ହୋଇଥିଲେ। ରୋଗିଣା ପୁଅକୁ ଧରି ବାପା ପ୍ରଥମେ ସିଂହଦ୍ବାରରେ ପ୍ରବେଶ ପରେ ପତିତପାବନ ଏବଂ େଶଷରେ ମହାପ୍ରଭୁଙ୍କ ପାଟ ଅଗଣାରେ ସମର୍ପି ଦେଇଥିଲେ। ଲୁହରେ ଭିଜିଥିଲା ଶ୍ରୀମନ୍ଦିର ସିଂହଦ୍ବାର ଏବଂ ପତିତପାବନ ଗୁମୁଟ। ଡାକ୍ତର ମନା କରିବା ପରେ ଶେଷରେ ଜଗତର ନାଥ ଜଗନ୍ନାଥଙ୍କ ନିକଟରେ ପୁଅ ପାଇଁ ଆଶ୍ରୟ ମାଗିଥିଲେ। ଠିକ୍ ୧୪ ଦିନ ପରେ ଶନିବାର ପୁଅକୁ ଧରି ଶ୍ରୀମନ୍ଦିର ସିଂହଦ୍ବାରରେ ପହଞ୍ଚି ଠାକୁରଙ୍କ ଆଶୀର୍ବାଦ ଭିକ୍ଷା କରିଛନ୍ତି।
