ନୂଆଦିଲ୍ଲୀ : ଭାରତୀୟ ଜନତା ପାର୍ଟି ସାସଂଦ ଶରଦ ତ୍ରିପାଠୀ ନିଜ ପାର୍ଟି ବିଧାୟକ ରାକେଶ ସିଂହ ବଘେଲଙ୍କୁ ଯୋତାରେ ନିର୍ଧୁମ ମାଡ ମାରିଛନ୍ତି। ସୂଚନା ଅନୁସାରେ ସନ୍ତ କବିର ନଗର ଠାରେ ଏକ ବୈଠକରେ ସାସଂଦ ଶରଦ ତ୍ରିପାଠୀ ଓ ବିଧାୟକ ରାକେଶ ସିଂହ ବଘେଲଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। କିନ୍ତୁ, ଆଖି ପିଛୁଳାକେ ଉଭୟ ନେତାଙ୍କ ମଧ୍ୟରେ ମାଡଗୋଳ ସ୍ଥିତି ଉପୁଜିଥିଲା। ପାଟିତୁଣ୍ଡ ପରେ ସାସଂଦ ଶରଦ ନିଜ ଯୋତା ବାହାର କରି ବିଧାୟକଙ୍କୁ ୮-୧୦ ଥର ମାଡ ମାରିଥିବାର ଦେଖିବାକୁ ମିଳିଥିଲା। ଏହାର ପ୍ରତି ଜବାବରେ ବିଧାୟକ ରାକେଶ ସିଂହ ସାସଂଦଙ୍କୁ ଚାପୁଡା ମାରିଥିଲେ। ସ୍ଥାନୀୟ ଲୋକ ଅଟକାଇବାକୁ ଚାହିଁଥିଲେ ମଧ୍ୟ ଦୁଇ ନେତାଙ୍କ ମାଡଗୋଳ ବନ୍ଦ ହେବାର ନା ନେଉନଥିଲା। ପରେ ଜଣେ ପୁଲିସ ଉଭୟ ନେତାଙ୍କୁ ଅଲଗା କରିଥିଲେ।
ଏହି ବୈଠକରେ ଜିଲାପାଳଙ୍କ ସମେତ ବହୁ ସ୍ଥାନୀୟ ନେତା ଥିବା ଜଣାପଡିଛି। ଏହି ଘଟଣା ଘଟିବା ପରେ ବିଧାୟକ ରାକେଶ ସିଂହ ବଘେଲଙ୍କ ସମର୍ଥକ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ। ବିଧାୟକଙ୍କୁ ମାଡ ମାରିବା ଘଟଣାରେ ସାସଂଦଙ୍କୁ ଗିରଫ କରିବା ଦରକାର ବୋଲି ଆନ୍ଦୋଳନକାରୀ ଦାବି କରିଥିଲେ।
