ଗୋପାଳପୁର : ଆସନ୍ତା ୫ ତାରିଖରେ ଜିଲ୍ଲା ପ୍ରଶାସନ ପକ୍ଷରୁ ଧୁମଧାମରେ ତିନି ଦିନିଆ ବୋଇତ ବନ୍ଦାଣ ମହୋତ୍ସବ ଆୟୋଜନ ନିମନ୍ତେ ସମସ୍ତ ପ୍ରସ୍ତୁତି ଜୋରସୋରରେ ଚାଲିଥିବା ବେଳେ ଗୋପାଳପୁର ବେଳାଭୂମି ଓ ବ୍ରହ୍ମପୁର-ଗୋପାଳପୁର ରାସ୍ତାରେ ଆଲୋକ ପ୍ରତି ପ୍ରଶାସନର ନିଘା ନଥିବା ଦେଖିବାକୁ ମିଳିଛି । ପ୍ରତିବର୍ଷ କାର୍ତ୍ତିକ ପୂର୍ଣ୍ଣିମା ଅବସରରେ ବୋଇତ ବନ୍ଦାଣ ଉତ୍ସବ ସହ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଏ । ଗତବର୍ଷ ଗୋପାଳପୁର ବିଧାୟକ ତଥା ରାଜ୍ୟ ଖଣି, ଇସ୍ପାତ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା ଙ୍କ ଉଦ୍ୟମ କ୍ରମେ ଜିଲ୍ଲା ପ୍ରଶାସନ ସହାୟତାରେ ଦିନିକିଆ ବୋଇତ ବନ୍ଦାଣ ସହ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ର ଆୟୋଜନ କରାଯାଇଥିଲା । କିନ୍ତୁ ଏନେଇ ପ୍ରଶାସନ ପକ୍ଷରୁ ପ୍ରଚାର ପ୍ରସାର ସଠିକ ଭାବେ କରାଯାଇନଥିବାରୁ ଲୋକଙ୍କ ଭିଡ଼ ସେପରି ପରିଲିକ୍ଷିତ ହୋଇ ପାରିନଥିଲା ।
ଚଳିତବର୍ଷ ମଧ୍ୟ ପ୍ରଶାସନ ପକ୍ଷରୁ ବୋଇତ ବନ୍ଦାଣ ମହୋତ୍ସବ ଆୟୋଜନ ନେଇ ସମସ୍ତ ଯୋଜନା ପ୍ରସ୍ତୁତି ହୋଇଥିବା ବେଳେ ଏନେଇ ପ୍ରଚାର ପ୍ରସାର ରେ ବହୁତ ପଛରେ ପଡି ଯାଇଥିବା ଦେଖିବାକୁ ମିଳିଛି । ଗୋପାଳପୁର ର କେତେକ ସ୍ଥାନରେ କେତେକ ହୋର୍ଡିଂ ଲଗାଯାଇଥିବା ଦେଖିବାକୁ ମିଳିଛି । ଅନ୍ୟପଟେ ଗୋପାଳପୁର ବେଳାଭୂମି ଗତ ଏକବର୍ଷ ଧରି ଅନ୍ଧାରରେ ରହୁଛି । ଏହାକୁ ନେଇ ଅନେକ ସମୟରେ ଅଭିଯୋଗ ସତ୍ତ୍ୱେ ଆଜିଯାଏଁ ଏହାର ମରାମତି ହୋଇ ପାରୁନାହିଁ । ଫଳରେ ବେଳାଭୂମି ସମ୍ପୂର୍ଣ ଅନ୍ଧାରରେ ରହିଛି ।ଏଥି ସହ ବ୍ରହ୍ମପୁର-ଗୋପାଳପୁର ରାସ୍ତା ର ଆଲୋକୀକରଣ ବିଡିଏ ପକ୍ଷରୁ ରକ୍ଷଣାବେକ୍ଷଣ କରାଯାଉନଥିବାରୁ ୧୦ କିମି ରାସ୍ତା ମଧ୍ୟରୁ କେବଳ ୫ କିମି ରାସ୍ତା ଉଜ୍ଵଳ ରହିଥିବା ବେଳେ ବଳକା ୫ କିମି ରାସ୍ତା (ବାହାଦୂର ପେଣ୍ଠ ଛ ଠାରୁ ବିଏସ୍ସିଟି କଲେଜ ଛକ ଏବଂ ବର୍ଜିସପେଣ୍ଠ ଛକ ଠାରୁ ଗୋପାଳପୁର ପର୍ଯ୍ୟନ୍ତ) ଗତ ଏକ ମାସ ରୁ ଉର୍ଦ୍ଧ୍ବ ସମୟ ହେବ ଅନ୍ଧାରରେ ରହିଛି । ଘଟଣାକୁ ନେଇ ଜିଲ୍ଲାପାଳଙ୍କୁ ଅବଗତ ପରେ ମଧ୍ୟ କୌଣସି ପରିବର୍ତ୍ତନ ଦେଖିବାକୁ ମିଳିନାହିଁ । ଫଳରେ ସନ୍ଧ୍ୟା ପରେ ଗୋପାଳପୁର ରୁ ପର୍ଯ୍ୟଟକ ମୁହଁ ମୋଡୁଥିବା ଦେଖିବାକୁ ମିଳିଛି। ଏଣୁ ପ୍ରଶାସନ ପକ୍ଷରୁ ମହୋତ୍ସବ ଆୟୋଜନ କରିବା ସହ ଗୋପାଳପୁର ବେଳାଭୂମି ର ଆଲୋକିକରଣ ସହ ଲାଗିରହିଥିବା ଅଭାବ ଅସୁବିଧା ଦୂର କରିବାକୁ ସାଧାରଣରେ ଦାବି ହେଉଅଛି।
