ରାଉରକେଲା: ଝାଡ଼ଖଣ୍ଡ ରାଜ୍ୟରେ ପୁଲିସ ସହ ଗୁଳି ବିନିମୟରେ ୩ ଉଗ୍ରବାଦୀଙ୍କ ମୃତ୍ୟୁ ଘଟିଛି। ଝାଡ଼ଖଣ୍ଡ ରାଜ୍ୟର ନିଷିଦ୍ଧ ଉଗ୍ରବାଦୀ ସଙ୍ଗଠନ ଝାଡ଼ଖଣ୍ଡ ଜନମୁକ୍ତି ପରିଷଦ (ଜେଜେଏମପି)ର ଦୁଇ ସବ୍ଜୋନାଲ କମାଣ୍ଡର ସମେତ ତିନି ଦୁର୍ଦ୍ଦାନ୍ତ ଉଗ୍ରବାଦୀ ଲାଲୁ ଲୋହାରା, ଛୋଟୁ ଓରାଓଁ ଓ ସୁଜିତ ଓରାଓଁଙ୍କ ଜିଲା ପୁଲିସ ଗୁଳିରେ ମୃତ୍ୟୁ ଘଟିଥିବା ବେଳେ ଗୋଟିଏ ଏକେ-୪୭ ଓ ଅନ୍ୟାନ୍ୟ ଅସ୍ତ୍ରଶସ୍ତ୍ର ଜବତ କରାଯାଇଛିା
ସୂଚନା ଅନୁଯାୟୀ ବିଶୁନପୁର ଥାନା ଅଞ୍ଚଳର ଜାଲିମ ଗାଁ ଜଙ୍ଗଲରେ ନିଷିଦ୍ଧ ଉଗ୍ରବାଦୀ ସଙ୍ଗଠନ ଝାଡ଼ଖଣ୍ଡ ଜନମୁକ୍ତି ପରିଷଦ (ଜେଜେଏମପି) ଏବଂ ଜିଲା ପୁଲିସ ବାହିନୀ ମଧ୍ୟରେ ବୁଧବାର ସକାଳେ ଗୁଳି ବିନିମୟ ହୋଇଥିଲା। ଗୁଳି ବିନିମୟରେ ନିହତ ଲୋହାରଦଗାର ବାସିନ୍ଦା ଲାଲୁ ଲୋହାରା ଜେଜେଏମପିର ସବ-ଜୋନାଲ କମାଣ୍ଡର ଥିଲେ। ପୁଲିସ ତାଙ୍କ ନିକଟରୁ ଏକ ଏକେ-୪୭ ଉଦ୍ଧାର କରିଛି। ତାଙ୍କ ମୁଣ୍ଡ ଉପରେ ପାଞ୍ଚ ଲକ୍ଷ ଟଙ୍କା ପୁରସ୍କାର ରାଶି ଘୋଷଣା କରିଥିଲେ ସରକାର।
ସେହିପରି ଲାତେହାରର ବାସିନ୍ଦା ଏବଂ ସବ-ଜୋନାଲ କମାଣ୍ଡର ଛୋଟୁ ଓରାଓଁ ମୁଣ୍ଡ ଉପରେ ମଧ୍ୟ ପାଞ୍ଚ ଲକ୍ଷ ଟଙ୍କା ପୁରସ୍କାର ଥିଲା। ତୃତୀୟ ଆତଙ୍କବାଦୀ ସୁଜିତ ଓରାଓଁ ଲୋହାରଦଗାର ବାସିନ୍ଦା ଏବଂ ସଙ୍ଗଠନର ଜଣେ କ୍ୟାଡର ନେତା ଥିଲେ। ଏହି ତିନିଜଣ ଦୀର୍ଘଦିନ ଧରି ଏହି ଅଞ୍ଚଳରେ ସକ୍ରିୟ ରହି ଅନେକ ଅପରାଧିକ କାର୍ଯ୍ୟରେ ସାମିଲ ଥିଲେ।
ଜେଜେଏମପିର ଜଣେ କୁଖ୍ୟାତ ଉଗ୍ରବାଦୀ ବ୍ରିଜେଶ ଯାଦବଙ୍କ ଦଳ ମଧ୍ୟ ଗୁଳି ବିନିମୟରେ ସାମିଲ୍ ଥିବା କୁହାଯାଉଛି ା ଉଗ୍ରବାଦୀମାନେ ସଂଘବଦ୍ଧ ହୋଇଥିବା ସୂଚନା ପାଇବା ପରେ, ଗୁମଲା ଏସପି ହରିଶ ବିନ୍ ଜମାନଙ୍କ ନେତୃତ୍ୱରେ ଜିଲା ପୁଲିସ ବାହିନୀ ଏବଂ ଝାଡ଼ଖଣ୍ଡ ଜାଗୁଆରର ଏକ ମିଳିତ ଦଳ ସମ୍ପୂର୍ଣ୍ଣ ଜଙ୍ଗଲ ଅଞ୍ଚଳକୁ ଘେରିଯାଇଥିଲା। ଏସ୍ପି ନିଜେ ସମଗ୍ର ଅପରେସନର କମାଣ୍ଡ ଗ୍ରହଣ କରିଥିଲେ। ପୁଲିସ ଜାଲିମ୍ ଜଙ୍ଗଲକୁ ସବୁ ପାର୍ଶ୍ୱରୁ ସିଲ୍ କରି ଦେବା ସହ ଗ୍ରାମ ରାସ୍ତାରେ ଯାତାୟତକୁ ସମ୍ପୂର୍ଣ୍ଣ ବନ୍ଦ କରି ଦେଇଥିଲା। ଗ୍ରାମବାସୀଙ୍କୁ ସତର୍କ ରହିବା ଏବଂ ଘରୁ ନ ବାହାରିବାକୁ ଅନୁରୋଧ କରିଛି ପୁଲିସ। ପୁଲିସ ଏନକାଉଣ୍ଟର ଖବର ପ୍ରସାରିତ ହେବା ପରେ ଆଖପାଖ ଗଁାରେ ଆତଙ୍କ ଖେଳିଯାଇଛି ା ଉଲ୍ଲେଖନୀୟ ଏହି ଦଳ ଦୀର୍ଘଦିନ ଧରି ଅଞ୍ଚଳରେ ଚାନ୍ଦା ଆଦାୟ, ସଶସ୍ତ୍ର ଡକାୟତି ଏବଂ ଅନ୍ୟାନ୍ୟ ଅପରାଧିକ କାର୍ଯ୍ୟରେ ଜଡିତ ଥିଲା। ପୂର୍ବରୁ ଏହି ଅଞ୍ଚଳ ସିପିଆଇ(ମାଓବାଦୀ)ର ଗଡ଼ ଥିଲା, କିନ୍ତୁ, ମାଓ ସଙ୍ଗଠନ ଦୁର୍ବଳ ହେବା ପରେ, ଜେଜେଏମପି ଏଠାରେ ପାଦ ଥାପିଥିଲା। ଦୁଇ ସଙ୍ଗଠନ ମଧ୍ୟରେ ସର୍ବୋଚ୍ଚତା ପାଇଁ ନିରନ୍ତର ଯୁଦ୍ଧ ମଧ୍ୟ ଲାଗି ରହିଥିଲା।
