ସମାଜ ଡିଜିଟାଲ ଡେସ୍କ: ରବିବାର ଚୀନରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଭେଟିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ତେବେ ଏହାର ଦିନକ ପୂର୍ବରୁ ଅର୍ଥାତ ଶନିବାର ଦିନ ପ୍ରଧାନମନ୍ତ୍ରୀ ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କିଙ୍କ ସହିତ ଫୋନ ଯୋଗେ କଥାବାର୍ତ୍ତା ହୋଇଛନ୍ତି। ଜେଲେନସ୍କି ନିଜ ତରଫରୁ ମୋଦୀଙ୍କୁ ଫୋନ କରିଛନ୍ତି। ଏହି ଅବସରରେ ମୋଦୀ ରୁଷ-ୟୁକ୍ରେନ ଯୁଦ୍ଧର ଶାନ୍ତିପୂର୍ଣ୍ଣ ଅବସାନ ପାଇଁ ସମସ୍ତ ପ୍ରକାର ସମର୍ଥନ ଯୋଗାଇଦେବାକୁ ଭାରତ ପ୍ରତିବଦ୍ଧ ବୋଲି ଜେଲେନସ୍କିଙ୍କୁ କହିଛନ୍ତି।
ସାମାଜିକ ଗଣମାଧ୍ୟମ ଏକ୍ସ’ରେ ଏକ ପୋଷ୍ଟରେ ପ୍ରଧାନମନ୍ତ୍ରୀ ଲେଖିଛନ୍ତି, ଆଜିର ଫୋନ କଲ୍ ପାଇଁ ଧନ୍ୟବାଦ ରାଷ୍ଟ୍ରପତି ଜେଲେନସ୍କି। ବର୍ତ୍ତମାନ ସମୟରେ ଜାରି ରହିଥିବା ଯୁଦ୍ଧ, ଏହାର ମାନବତା ଦୃଷ୍ଟିକୋଣ ଏବଂ ଶାନ୍ତି ଓ ସ୍ଥିରତା ପୁନଃ ପ୍ରତିଷ୍ଠା ପାଇଁ ପଦକ୍ଷେପ ସମ୍ପର୍କରେ ନିଜର ମତାମତ ବିନିମୟ କରିଛୁ। ଏ ଦିଗରେ ଭାରତ ପୂର୍ଣ୍ଣ ସମର୍ଥନ କରିବ ବୋଲି ମୋଦୀ ଲେଖିଛନ୍ତି। ଏହା ବ୍ୟତୀତ ଭାରତ-ୟୁକ୍ରେନ ମଧ୍ୟରେ ଦ୍ଵିପାକ୍ଷିକ ଭାଗିଦାରୀ ଉପରେ ମଧ୍ୟ ଦୁଇ ନେତା ଆଲୋଚନା କରିଛନ୍ତି।
