ସମାଜ ଡିଜିଟାଲ ଡେସ୍କ: ରାଜଧାନୀ ନୂଆଦିଲ୍ଲୀରେ ଟ୍ରିପଲ ମର୍ଡର ଘଟିଛି। ଜଣେ ଦମ୍ପତି ଏବଂ ତାଙ୍କ ବଡ଼ ପୁଅକୁ ଦୁର୍ବୃତ୍ତମାନେ ଅତି ବୀଭତ୍ସ ଭାବେ ହତ୍ୟା କରିଛନ୍ତି। ସାନ ପୁଅ ନିଖୋଜ ଥିବାରୁ ସେ ହିଁ ହତ୍ୟାକାରୀ ବୋଲି ପୁଲିସ ସନ୍ଦେହ କରୁଛି। ଦକ୍ଷିଣ ଦିଲ୍ଲୀର ସାତବାରି ଗ୍ରାମରେ ଘଟିଥିବା ଏହି ହତ୍ୟାକାଣ୍ଡ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି।
ବୁଧବାର ବିଳମ୍ବିତ ରାତିରେ ଏହି ହତ୍ୟାକାଣ୍ଡ ଘଟିଥିବା ଜଣାପଡ଼ିଛି। ହତ୍ୟାର ଶିକାର ହୋଇଛନ୍ତି ପ୍ରେମ ସିଂହ(୪୫), ତାଙ୍କ ପତ୍ନୀ ରଜନୀ(୪୦) ଏବଂ ବଡ଼ ପୁଅ ରିତିକ(୨୪)। ସାନପୁଅ ସିଦ୍ଧାର୍ଥ(୨୨) ନିଖୋଜ ଥିବାରୁ ସେ ହିଁ ଏଭଳି ଜଘନ୍ୟ ହତ୍ୟାକାଣ୍ଡ ଘଟାଇଥିବା ସନ୍ଦେହ ଦୃଢ଼ୀଭୂତ ହେଉଛି।
ପୁଲିସ ସୂଚନା ଅନୁସାରେ, ମଇଦାନ ଗଢ଼ି ଥାନାକୁ ଏକ ଫୋନ ଆସିଥିଲା। ଉକ୍ତ ଗାଁରେ ଏକ ଘର ଭିତରୁ ବାହାରକୁ ରକ୍ତ ବହି ଆସିଥିବା ଲୋକେ ଦେଖି ପୁଲିସକୁ ଖବର ଦେଇଥିଲେ। ଏହା ପରେ ପୁଲିସ ସେଠାରେ ପହଞ୍ଚିଥିଲା। ତଳ ମହଲାରେ ୨ଟି ରକ୍ତ ଜୁଡ଼ୁବୁଡ଼ୁ ମୃତଦେହ ପଡ଼ିଥିବାବେଳେ ପ୍ରଥମ ମହଲାରେ ଗୋଟିଏ ମୃତଦେହ ପଡ଼ିଥିବା ଦେଖିବାକୁ ମିଳିଥିଲା। ଫୋରେନସିକ ଟିମ୍ ପହଞ୍ଚି ତଦନ୍ତ କରିଛି। ୩ ଜଣଙ୍କୁ ଛୁରି ଦ୍ଵାରା ଏକାଧିକ ଥର ଗଳାକାଟି ହତ୍ୟା କରାଯାଇଛି। ପାରପାର୍ଶ୍ବିକ ସ୍ଥିତି ଏବଂ ହସ୍ତଗତ କିଛି ପ୍ରମାଣରୁ ସାନ ପୁଅ ହିଁ ଏହି ହତ୍ୟାକାଣ୍ଡରେ ସମ୍ପୃକ୍ତ ଥିବା ପୁଲିସ କହିଛି। ତାଙ୍କୁ ଧରିବା ପାଇଁ ପୁଲିସ ଉଦ୍ୟମ ଚଳାଇଛି।
