ଫୁଲବାଣୀ: କନ୍ଧମାଳ ଏସପି ହରିଶ ବିଶିଙ୍କ ନିର୍ଦ୍ଦେଶକ୍ରମେ ବିଦ୍ୟାଳୟର ଛାତ୍ରଛାତ୍ରୀମାନଙ୍କୁ ପୁଲିସର କାର୍ଯ୍ୟକାରିତା ବିଷୟରେ ଅବଗତ କରାଇବା ଲାଗି ଶନିବାର ଏକ୍ସପୋଜର ଭିଜିଟ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏହି ଅବସରରେ ଫୁଲବାଣୀ ସତ୍ୟସାଇ ଉଚ୍ଚବିଦ୍ୟାଳୟର ଛାତ୍ରଛାତ୍ରୀମାନେ ସେମାନଙ୍କ ଶିକ୍ଷକମାନଙ୍କ ତତ୍ତ୍ଵାବଧାନରେ ଆସି ପହଞ୍ଚିଥିଲେ। ସେମାନଙ୍କୁ ଫୁଲବାଣୀ ଏସଡିପିଓ ସୁଭ୍ରଜିତ ବିଶ୍ଵାଳ ଓ ଆଦର୍ଶ ଥାନା ଅଧିକାରୀ ସ୍ବରୁପ କିଶାନ ଛାତ୍ରଛାତ୍ରୀମାନଙ୍କୁ ଚକୋଲେଟ୍ ଦେଇ ସ୍ବାଗତ କରିଥିଲେ।
ପରେ ସେମାନେ ସମଗ୍ର ଥାନା ବୁଲି ଦେଖିବା ସହିତ ପୁଲିସର କାର୍ଯ୍ୟକଳାପ ବାବଦରେ ଓ ବିଭିନ୍ନ ଅପରାଧ ଓ ସେମାନଙ୍କ ବିରୋଧରେ ପୁଲିସ ନେଉଥିବା ବିଭିନ୍ନ କାର୍ଯ୍ୟାନୁଷ୍ଠାନ, ଥାନାରେ ଥିବା ମାଲଖାନା, ପୁଲିସର କାର୍ଯ୍ୟଶୈଳୀ ଆଦି ଭଳି ବିଭିନ୍ନ ବିଷୟରେ ପଚାରି ବୁଝିଥିଲେ। ସେମାନଙ୍କୁ ଏହି ସବୁ ବାବଦରେ ଏସଡିପିଓ ଏବଂ ଥାନା ଅଧିକାରୀ ପ୍ରାଞ୍ଜଳତାର ସହିତ ଖୋଲାଖୋଲି ବୁଝାଇଥିଲେ। ଏପରିକି ବର୍ତ୍ତମାନ ସମାଜରେ ଛାତ୍ରୀମାନେ ସମ୍ମୁଖୀନ ହେଉଥିବା ଯୌନ ଶୋଷଣ ଓ ଏହାର ଆଇନ ବାବଦରେ ମଧ୍ୟ ଆଲୋଚନା କରାଯାଇଥିଲା। ଏହିଭଳି କାର୍ଯ୍ୟକ୍ରମ ଦ୍ଵାରା ଛାତ୍ରଛାତ୍ରୀମାନେ ପୁଲିସ, ଥାନା ଓ ଏହି ବାବଦରେ ଜାଣିବାକୁ ପାଇବା ସହ ଆବଶ୍ୟକ ସ୍ଥଳେ ସେମାନେ ଯେକୌଣସି ସମସ୍ୟାରେ ଭୟ ନ କରି ନିଜେ ପୁଲିସ ନିକଟରେ ପହଞ୍ଚି ପାରିବେ ବୋଲି କହିଛନ୍ତି ଏସଡିପିଓ। ଆଗକୁ ଏହି କାର୍ଯ୍ୟକ୍ରମ ଜରିଆରେ ସମସ୍ତ ବିଦ୍ୟାଳୟର ଛାତ୍ରଛାତ୍ରୀମାନଙ୍କ ଏକ୍ସପୋଜର ଭିଜିଟ୍ ଜାରି ରହିବ ବୋଲି କହିଛନ୍ତି।
