ସମ୍ବଲପୁର: ଅବକାରୀ ବିଭାଗ ପକ୍ଷରୁ ବିଭିନ୍ନ ସ୍ଥାନରେ ଚଢ଼ାଉ କରାଯାଇ ୧୧୨୦ ବୋତଲ ନିଶା କଫସିରପ ଜବତ କରାଯିବା ସହିତ ୭ ଅଭିଯୁକ୍ତଙ୍କୁ ଗିରଫ କରାଯାଇଛି। ଉତ୍ତରାଞ୍ଚଳ ଇଆଇଇବି ୟୁନିଟ ପକ୍ଷରୁ ୨ଟି ସ୍ଥାନରେ ଚଢ଼ଉ କରାଯାଇ କଫସିରପ ଜବତ କରିବା ସହିତ ୪ ଜଣଙ୍କୁ ଗିରଫ କରାଯାଇଛି। ସେହିପରି ସମ୍ବଲପୁରର ଅଇଁଠାପାଲି ଥାନାଞ୍ଚଳ ଦେଇ ଚାଲାଣ ହେଉଥିବା ୭ ଶହ ନିଶା କଫ ସିରପ ପୁଲିସ ଜବତ କରିବା ସହ ୩ ଅଭିଯୁକ୍ତଙ୍କୁ ଗିରଫ କରିଛି।
ଅବକାରୀ ବିଭାଗର ସୁଚନା ଅନୁଯାୟୀ, ପ୍ରଥମ ଘଟଣାରେ ସମ୍ବଲପୁର – କଟକ ଜାତୀୟ ରାଜପଥର ଧନୁପାଲି ଅଞ୍ଚଳ ଦେଇ କଫସିରପ ଚାଲାଣ ଖବର ମିଳିବା ପରେ ଯାନବାହନ ଯାଞ୍ଚ କରାଯାଇଥିଲା। ଏହି ସମୟରେ ଯୁଯୁମୁରା ଥାନା ଅନ୍ତର୍ଗତ ହିରୋ ନିବାସୀ ଦେବାଶିଷ ଥାପା(୨୩) ଓ ହୀରାକୁଦ ଥାନାଞ୍ଚଳର ନୁଆଗୁଜାତଲ ନିବାସୀ ତୁଷାର ଭୋଇ(୧୯) ଙ୍କୁ ଏକ ଦାମୀ କାର ସହିତ ଧରାଯାଇଥିଲା। ଗାଡିକୁ ଯାଞ୍ଚ ସମୟରେ ସେଥିରେ ୨୪୦ଟି ନିଶା କଫସିରପ ବୋତଲ ୩ଟି ଜରି ବସ୍ତା ମଧ୍ୟରେ ରଖାଯାଇଥିବା ଦେଖିବାକୁ ମିଳିଥିଲା।
ସେହିଭଳି ଅଇଁଠାପାଲି ବସଷ୍ଟାଣ୍ଡ ନିକଟରେ ଶନିବାର ଚେକିଂ ସମୟରେ ସନ୍ଦିଗ୍ଧ ଭାବରେ ଯାଉଥିବା ଏକ ସ୍କୁଟିକୁ ଅଟକାଯାଇ ଯାଞ୍ଚ କରାଯାଇଥିଲା । ସ୍କୁଟିରୁ ୧୮୦ଟି ନିଶା କଫ ସିରପ ବୋତଲ ମିଳିଥିଲା। ଏଣୁ ସ୍କୁଟି, ନିଶା କଫ ସିରପ ଓ ୨ଟି ମୋବାଇଲ ଫୋନ ଜବତ କରାଯାଇ ଚାଲାଣକାରୀ ସାହୁ କଲୋନୀ ନିବାସୀ ତନ୍ମୟ ନାଏକ (୨୨) ଓ ମୁଦିପଡା ଦେଉଳବନ୍ଧ ନିବାସୀ କୋଶଳ ମଲ୍ଲିକ (୨୨)ଙ୍କୁ ଗିରଫ କରାଯାଇଛି ।
ଅନ୍ୟ ଏକ ଘଟଣାରେ ଅଇଁଠାପାଲି ଉପର ଛକଠାରେ ଚଢ଼ାଉ କରାଯାଇ ଚାଲାଣ ନିମନ୍ତେ ରଖାଯାଇଥିବା ୭୦୦ ନିଶା କଫସିରପ ଜବତ କରାଯାଇଛି। ଏହି ଘଟଣାରେ ମାନେଶ୍ୱର କଣ୍ଟେଇପାଲି ନିବାସୀ ଏମଡି ସୋନୁ ଓରଫ ୟୁନୁସ (୩୧), ସୋମନାଥ ପ୍ରଧାନ (୩୪) ଓ ଚନ୍ଦ୍ରଶେଖର କୁମ୍ଭାର (୨୪)ଙ୍କୁ ଗିରଫ କରାଯାଇଛି।
