ଡେସ୍କ: ଭାରତ-ବାଂଲାଦେଶ ମଧ୍ୟରେ ସମ୍ପର୍କରେ ତିକ୍ତତା ମଧ୍ୟରେ ଭାରତ ଘୋଷଣା କରିଛି ଯେ ବୈଦେଶିକ ସଚିବ ବିକ୍ରମ ମିଶ୍ରି ଡିସେମ୍ବର ୯ ରେ ବାଂଲାଦେଶ ଗସ୍ତରେ ଯିବେ।
ହିନ୍ଦୁ ଓ ଅନ୍ୟ ସଂଖ୍ୟାଲଘୁଙ୍କ ବିରୋଧରେ ହିଂସାକାଣ୍ଡର ଖବର ଆସିବା ପରେ ସେମାନଙ୍କ ସୁରକ୍ଷା ସୁନିଶ୍ଚିତ କରିବାକୁ ନୂଆଦିଲ୍ଲୀ ଢାକାକୁ ଅନୁରୋଧ କରିବାର କିଛି ଦିନ ପରେ ଏହି ଗସ୍ତ କାର୍ଯ୍ୟକ୍ରମ ସ୍ଥିର ହୋଇଛି। ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସ୍ୱାଲ କହିଛନ୍ତି, ବୈଦେଶିକ ସଚିବ ଡିସେମ୍ବର ୯ରେ ବୈଦେଶିକ କାର୍ଯ୍ୟାଳୟ ପରାମର୍ଶ ପାଇଁ ବାଂଲାଦେଶ ଗସ୍ତ କରିବାର କାର୍ଯ୍ୟକ୍ରମ ରହିଛି। ଏହା ବାଂଲାଦେଶ ପକ୍ଷ ସହ ଆମର ଗଠନମୂଳକ ଆଲୋଚନାର ଏକ ଅଂଶ।
ଗତ ସପ୍ତାହରେ ବାଂଲାଦେଶ ପୁଲିସ ହିନ୍ଦୁ ସନ୍ନ୍ୟାସୀ ଚିନ୍ମୟ କୃଷ୍ଣ ଦାସ ବ୍ରହ୍ମଚାରୀଙ୍କୁ ଦେଶଦ୍ରୋହ ଅଭିଯୋଗରେ ଗିରଫ କରିଥିଲା ଏବଂ ସେଠାକାର ଏକ ଅଦାଲତ ତାଙ୍କୁ ଜାମିନ ଦେବାକୁ ମନା କରି ଦେଇଥିଲେ। ଏଥିପାଇଁ ଭାରତ ଗଭୀର ଉଦବେଗ ପ୍ରକାଶ କରିବା ସହ ବାଂଲାଦେଶରେ ହିନ୍ଦୁ ଓ ସମସ୍ତ ସଂଖ୍ୟାଲଘୁଙ୍କ ସୁରକ୍ଷା ସୁନିଶ୍ଚିତ କରିବାକୁ କର୍ତ୍ତୃପକ୍ଷଙ୍କୁ ଅନୁରୋଧ କରିଛି।
ଶୁକ୍ରବାର ଯେତେବେଳେ ତାଙ୍କୁ ଏହି ମାମଲା ବିଷୟରେ ପଚରା ଯାଇଥିଲା, ଜୟସ୍ୱାଲ କହିଥିଲେ, ଆମେ ପୂର୍ବରୁ ଏହି ପ୍ରସଙ୍ଗରେ କଥା ହୋଇଛୁ। ଆମେ ଆମର ଆଶା ଦୋହରାଇବାକୁ ଚାହୁଁଛୁ ଯେ ବାଂଲାଦେଶରେ ଚାଲିଥିବା ପ୍ରାସଙ୍ଗିକ ଆଇନଗତ ପ୍ରକ୍ରିୟାଗୁଡ଼ିକ ନିରପେକ୍ଷ, ନ୍ୟାୟସମ୍ପନ୍ନ ଏବଂ ସ୍ୱଚ୍ଛ ଢଙ୍ଗରେ କାର୍ଯ୍ୟକାରୀ ହେବ ଏବଂ ସମ୍ପୃକ୍ତ ବ୍ୟକ୍ତି ବିଶେଷଙ୍କ ଆଇନଗତ ଅଧିକାର ପ୍ରତି ସମ୍ପୂର୍ଣ୍ଣ ସମ୍ମାନ ସୁନିଶ୍ଚିତ କରିବ।
ହିନ୍ଦୁମାନଙ୍କ ସୁରକ୍ଷା ଦାବିରେ ରାଲିର ନେତୃତ୍ୱ ନେଉଥିବା ଶ୍ରୀ ଦାସଙ୍କୁ ଗତ ସପ୍ତାହରେ ଦକ୍ଷିଣ-ପୂର୍ବ ବାଂଲାଦେଶର ଚଟ୍ଟୋଗ୍ରାମ ଯାଉଥିବା ବେଳେ ଢାକାର ମୁଖ୍ୟ ବିମାନବନ୍ଦରରୁ ଗିରଫ କରାଯାଇଥିଲା।
ଅକ୍ଟୋବର ମାସରେ ଚଟ୍ଟୋଗ୍ରାମରେ ଏକ ରାଲିର ନେତୃତ୍ୱ ନେବା ପରେ ତାଙ୍କ ବିରୋଧରେ ଦେଶଦ୍ରୋହ ମାମଲା ରୁଜୁ ହୋଇଥିଲା, ଯେଉଁଥିରେ ତାଙ୍କ ବିରୋଧରେ ବାଂଲାଦେଶ ଜାତୀୟ ପତାକାକୁ ଅସମ୍ମାନ କରିଥିବା ଅଭିଯୋଗ ହୋଇଥିଲା। ବାଂଲାଦେଶ ସଂସ୍କୃତି ସନାତନ ଜାଗରଣ ଗୋଷ୍ଠୀର ସଦସ୍ୟ ଶ୍ରୀ ଦାସ ଇଣ୍ଟରନ୍ୟାସନାଲ ସୋସାଇଟି ଫର କ୍ରିଷ୍ଣା ଚେତନା (ଇସ୍କନ) ସହ ଜଡ଼ିତ ଅଛନ୍ତି। ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲ ପଠାଇ ଦିଆଯାଇଥିବାରୁ ଢାକା ଓ ଚଟ୍ଟୋଗ୍ରାମ ସମେତ ବିଭିନ୍ନ ସ୍ଥାନରେ ସମ୍ପ୍ରଦାୟର ଲୋକେ ବିକ୍ଷୋଭ ପ୍ରଦର୍ଶନ କରିଥିଲେ।
