ସମାଜ ଡିଜିଟାଲ ଡେସ୍କ: ଇଣ୍ଡିଆନ ଓଭରସିଜ କଂଗ୍ରେସ ଅଧ୍ୟକ୍ଷ ସାମ୍ ପିଟ୍ରୋଡାଙ୍କ ଲାପଟପ, ମୋବାଇଲ ଫୋନ ଏବଂ ସର୍ଭରକୁ ହ୍ୟାକ କରିନେଇଛନ୍ତି ହ୍ୟାକର। ହ୍ୟାକ୍ କରିବା ପରେ ସେମାନେ ପିଟ୍ରୋଡାଙ୍କୁ ବ୍ଲାକମେଲ କରିବା ଆରମ୍ଭ କରିଦେଇଛନ୍ତି। ଏସବୁରୁ ମୁକ୍ତି ପାଇଁ ସେମାନେ ପିଟ୍ରୋଡାଙ୍କୁ କ୍ରିପ୍ଟୋକରେନ୍ସି ରୂପରେ ପ୍ରଚୁର ଅର୍ଥ ଦାବି କରିଛନ୍ତି। ଟଙ୍କା ନ ଦେଲେ ସେମାନେ ପିଟ୍ରୋଡାଙ୍କ ଫୋନ, ଇମେଲ ବ୍ୟବହାର କରି ତାଙ୍କୁ ବଦନାମ କରିଦେବେ ବୋଲି ଧମକ ଦେଇଛନ୍ତି।
ଘଟଣା ସମ୍ପର୍କରେ ପିଟ୍ରୋଡା ନିଜେ ଗଣମାଧ୍ୟମକୁ ସୂଚନା ଦେଇଛନ୍ତି। ତାଙ୍କ ମୋବାଇଲ ନମ୍ବର କିମ୍ବା ଇ-ମେଲରୁ ତାଙ୍କ ନାମରେ କାହାକୁ କୌଣସି ବାର୍ତ୍ତା କିମ୍ବା ଲିଙ୍କ ଗଲେ ତାହାକୁ ନ ଖୋଲିବାକୁ ସେ ଅନୁରୋଧ କରିଛନ୍ତି। ପିଟ୍ରୋଡାଙ୍କ ସମ୍ପର୍କରେ ଥିବା ବିଶିଷ୍ଟ ବ୍ୟକ୍ତିବିଶେଷମାନଙ୍କୁ ସେ କୌଣସି ଅଜଣା ଲିଙ୍କ ନ ଖୋଲିବାକୁ ପରାମର୍ଶ ଦେଇଛନ୍ତି।
