ସମ୍ବଲପୁର: ଗତ ୨୦ ତାରିଖରୁ ଡିସେମ୍ବର ୩୧ ତାରିଖ ପର୍ଯ୍ୟନ୍ତ ଚାଲିଥିବା ନିଶା ବିରୋଧୀ ଅଭିଯାନ କ୍ରମରେ ଶନିବାର ସମ୍ବଲପୁର ପୁଲିସ ୫ ଜଣ ନିଶା ଓ ସଟ୍ଟା ବେପାରୀଙ୍କୁ ଗିରଫ କରିଛି । ସଦର ଏସଡିପିଓ ତୁଫାନ ବାଗ ଆୟୋଜିତ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ସହରରେ ଚାଲିଥିବା ଅବୈଧ ସଟ୍ଟା ଓ ନିଶା ଦ୍ରବ୍ୟ କାରବାର ଉପରେ ଚଢ଼ାଉ ଅଭିଯାନ ଜାରି ରହିଛି। ସହରର ବିଭିନ୍ନ ଥାନାଞ୍ଚଳରେ ଚଢ଼ଉ କରାଯାଇ ୩ ଜଣ ନିଶା କଫ ସିରପ ବେପାରୀ ଓ ୨ ଜଣ ସଟ୍ଟା ବେପାରୀଙ୍କୁ ଗିରଫ କରାଯାଇଛି । ଚଢ଼ଉ ସମୟରେ ୧୧୫ ବୋତଲ ନିଶା କଫ ସିରପ, ୧୫ ଲିଟର ଦେଶୀ ପାଉଚ ମଦ, ନିଶା ବଟିକା, ୨ ଶହ ଟଙ୍କା ଓ ଅପମିଶ୍ରିତ ନିଶା ଦ୍ରବ୍ୟ ଜବତ କରାଯାଇଛି। ବରେଇପାଲି ପୁଲିସ ଦ୍ୱାରା ରେମେଡର ଚେପଟିପୁଲିଆ ନିକଟରେ ଚଢ଼ଉ ସମୟରେ ବରଗଡ ଜିଲା ଭଟଲି ନିବାସୀ ସୁଦାମ ସୁନାନୀ(୨୬), ବରେଇପାଲି ନିବାସୀ ମୁକ୍ତିଲାଭ ମହାକୁଡ(୧୯) ଏବଂ ତାଲଭଟ୍ଟପଡା ନିବାସୀ ସୁନୀଲ ମହାନ୍ତି(୨୦)ଙ୍କୁ ଗିରଫ କରାଯାଇଛି । ଧରା ପଡିଥିବା ଯୁବକ ମାନେ ଟ୍ରେନ ସଫେଇ କରୁଥିବା ଠିକା ସଂସ୍ଥା କର୍ମଚାରୀ ଅଟନ୍ତି। ସେମାନେ ଟ୍ରେନ ଜରିଆରେ ପଶ୍ଚିମବଙ୍ଗର କଲକାତା ଅଞ୍ଚଳରୁ ବେଆଇନ ଭାବରେ ଏହି ନିଶା ଦ୍ରବ୍ୟଗୁଡିକୁ ଚାଲାଣ କରି ଆଣୁଥିଲେ ବୋଲି ପଚରାଉଚରା ସମୟରେ କହିଛନ୍ତି। ଏ ସମ୍ପର୍କରେ ବରେଇପାଲି ଥାନାରେ ଏକ ମାମଲା ରୁଜୁ କରି ସମସ୍ତ ଅଭିଯୁକ୍ତଙ୍କୁ ଗିରଫ କରି ଦାଲତକୁ ଚାଲାଣ କରାଯାଇଛି।
ସେହିଭଳି ଟାଉନ ଥାନା ଅନ୍ତର୍ଗତ ପୀରବାବା ଛକ ନିକଟରେ ଚାଲିଥିବା ସଟ୍ଟା ଉପରେ ଚଢ଼ାଉ କରାଯାଇ କୈଳାଶ ଶର୍ମା(୬୯) ନାମକ ଏକ ବରିଷ୍ଠ ନାଗରିକଙ୍କୁ ଗିରଫ କରାଯାଇଛି। ତାଙ୍କଠାରୁ ୨୬ ହଜାର ୩ ୫୦ ଟଙ୍କା, ସଟ୍ଟା ଚାର୍ଟ, ଗୋଟିଏ କଲମ, ଗୋଟିଏ ସଟ୍ଟା ବହି ଜବତ କରାଯାଇଛି । ଅନ୍ୟ ଏକ ଚଢ଼ାଉରେ ମୁଦିପଡା ଗୁରୁଦ୍ୱାରା ନିକଟରୁ ପିଙ୍କୁ ରାଜହଂସ ନାମକ ଯୁବକଙ୍କୁ ଧରାଯାଇ ତା ନିକଟରୁ ୧୨୨୦ ଟଙ୍କା ସଟ୍ଟା ଚାର୍ଟ, ଗୋଟିଏ କଲମ, ସଟ୍ଟା ବହି ଆଦି ଜବତ କରାଯାଇଥିବା ଏସଡିପିଓ ବାଗ କହିଛନ୍ତି।
