ଆଠଗଡ: ଆଠଗଡ ଅବକାରୀ ବିଭାଗ ପକ୍ଷରୁ ଚଢାଉ କରାଯାଇ ଏକ ବାଇକ ଓ ୩୦ ଲିଟର ଚୋରା ଦେଶୀ ମଦ ଜବତ କରାଯିବା ସହ ଜଣେ ଅଭିଯୁକ୍ତକୁ ଗିରଫ କରାଯାଇଛି। ଆଠଗଡ ଅବକାରୀ ସ୍କ୍ଵାଡ୍ ପକ୍ଷରୁ ରବିବାର ବିଭିନ୍ନ ରାସ୍ତାରେ ଯାଞ୍ଚ ଚାଲିଥିବାବେଳେ ଏହି ମଦ ଜବତ ହୋଇଥିଲା । ଖୁଣ୍ଟୁଣୀ-ନରସିଂହପୁର ୬୫ ନଂ ରାଜ୍ୟ ରାଜପଥର ଆଠଗଡ ଏନଏସି ୧ନଂ ୱାର୍ଡ ଅନ୍ତର୍ଗତ ହେମମାଳପୁର ଛକଠାରେ ଅବକାରୀ ସ୍କ୍ୱାଡ୍ ଦ୍ରୁତଗତିରେ ଯାଉଥିବା ଏକ ବାଇକକୁ ଅଟକାଇ ଯାଞ୍ଚ କରିଥିଲେ । ଯାଞ୍ଚ ବେଳେ ସେଥିରେ ଦୁଇଟି ରବର ବ୍ଲାଡରରେ ଚାଲାଣ ହେଉଥିବା ୩୦ ଲିଟର ଦେଶୀ ମଦକୁ ଜବତ କରିଥିଲେ। ମଦ ଚାଲାଣ କରୁଥିବା ବାଙ୍କୀ ଥାନା ଅନ୍ତର୍ଗତ କଦଳୀବାଡି ଅଞ୍ଚଳର ମିଥୁନ ବେହେରା ନାମକ ଅଭିଯୁକ୍ତକୁ ଗିରଫ କରି କୋର୍ଟଚାଲାଣ କରାଯାଇଛି। ଆଠଗଡ ଅବକାରୀ ଉପଅଧୀକ୍ଷକ ନିମାଇଁ ଚରଣ ସିଂହଙ୍କ ନେତୃତ୍ଵରେ ନିରୀକ୍ଷକ ରବି ନାରାୟଣ ପ୍ରଧାନ ଓ ସହକାରୀ ଉପନିରୀକ୍ଷକ ସରୋଜ କୁମାର ସାହୁଙ୍କ ସମେତ ଅନ୍ୟ ଅବକାରୀ କର୍ମଚାରୀ ଚଢାଉରେ ଅଂଶଗ୍ରହଣ କରିଥିଲେ ।
Comments are closed.