ଲଡୁଗାଁ : କଳାହାଣ୍ଡି ଜିଲା କୋକସରା ବ୍ଲକ ବଙ୍ଗୋମୁଣ୍ଡା ଆଦର୍ଶ ବିଦ୍ୟାଳୟ ପରିସରରେ ବିଜ୍ଞାନ ମେଳା ଅନୁଷ୍ଠିତ ହୋଇଯାଇଛି । ପର୍ଲା ଆଦର୍ଶ ବିଦ୍ୟାଳୟ ଅଧ୍ୟକ୍ଷ ଅଭିଷେକ ମହାନ୍ତି ମୁଖ୍ୟ ଅତିଥି ଭାବେ ଯୋଗଦେଇ ବିଜ୍ଞାନ ମେଳାର ଉଦଘାଟନ କରି ପିଲାମାନଙ୍କ ଦ୍ବାରା ପ୍ରଦର୍ଶିତ ସମସ୍ତ ପ୍ରକଳ୍ପ ଗୁଡିକୁ ବୁଲି ଦେଖିଥିଲେ ଏବଂ ସେମାନଙ୍କୁ ଉତ୍ସାହିତ କରିଥିଲେ । ପିଲାମାନଙ୍କ ସ୍ବନିର୍ମିତ ପ୍ରକଳ୍ପକୁ ମୂଲ୍ଯାୟନ କରିବା ପାଇଁ ବିଚାରକ ଭାବେ ଶିକ୍ଷକ କମଳାକାନ୍ତ ସାହୁ, ନୀତିଶ କୁମାର ଛନ୍ଦା, ବିଶ୍ବ ରଞ୍ଜନ ସାହୁ, ଅମୂଲ୍ୟ କୁମାର ସିଂ, ସରୋଜ କୁମାର ସେଠୀ ଓ ନଳିନୀପ୍ରଭା ନାଏକ ପ୍ରମୁଖ ଯୋଗ ଦେଇଥିଲେ । ବିଦ୍ୟାଳୟର ଅନ୍ୟ ଶିକ୍ଷକ ଶିକ୍ଷୟତ୍ରୀମାନେ ଏହି କାର୍ଯ୍ୟକ୍ରମକୁ ସୁଚାରୁ ରୂପେ ପରିଚାଳନା କରିଥିବାବେଳେ ପ୍ରଜ୍ଞା ବିନୋଦିନୀ ଓ କିଶନ କୁମାର ତାଣ୍ଡି ସଂଯୋଜନା କରିଥିଲେ ।
ଏଥିରେ ବିଦ୍ୟାଳୟର ୯୬ ଜଣ ଛାତ୍ରଛାତ୍ରୀଙ୍କ ଦ୍ବାରା ମୋଟ ୯୬ଟି ପ୍ରକଳ୍ପ ପ୍ରଦର୍ଶିତ ହୋଇଥିଲା । ଜୁନିୟର ବିଭାଗରେ ଅନ୍ୱେଷାଶ୍ରୀଷ୍ଟି ପଣ୍ଡା, ଅଂଶୁମାନ ବେହେରା, ଆୟୁଷ୍ମାନ ମହାପାତ୍ର ଓ ସିନିୟର ବିଭାଗରେ ଆଶୁତୋଷ ସିଂହଲ, ପ୍ରଜ୍ଞାଶ୍ରୀ ଚୌଧୁରୀ ଓ ଅପରାଜିତା ମୁଣ୍ଡ ଯଥାକ୍ରମେ ପ୍ରଥମ, ଦ୍ୱିତୀୟ, ତୃତୀୟ ହୋଇଥିଲେ । ତନ୍ମଧ୍ୟରୁ ଅନ୍ୱେଷାଶ୍ରୀଷ୍ଟି ପଣ୍ଡାଙ୍କ ପ୍ରଦର୍ଶିତ ‘ଜରୁରୀକାଳୀନ ସେବା ପାଇଁ ହାଇଡ୍ରୋଲିକ୍ ଲିଫ୍ଟ ବ୍ୟବସ୍ଥା’ ଯାହାକି ଟ୍ରାଫିକ ଭିଡ଼ ସମୟରେ ହାଇଡ୍ରୋଲିକ ଲିଫ୍ଟ ମାଧ୍ୟମରେ ଆମ୍ବୁଲାନ୍ସ ,ଦମକଳ ତଥା ପୋଲିସ୍ ସେବା ଆଦି ସହଜରେ ରାସ୍ତା ଅତିକ୍ରମ କରି ନିଜ ଗନ୍ତବ୍ୟସ୍ଥଳକୁ ପହଞ୍ଚୁଥିବା ଏହି ପ୍ରକଳ୍ପ ସମସ୍ତଙ୍କୁ ବେଶ୍ ଆକୃଷ୍ଟ କରିଥିଲା । ପିଲାମାନଙ୍କ ମଧ୍ୟରେ ଲୁକ୍କାୟିତ ଭାବେ ରହିଥିବା ବୈଜ୍ଞାନିକ କଳାକୁ ଲୋକଲୋଚନକୁ ଆଣିବା ନିମନ୍ତେ ପ୍ରତ୍ୟେକ ବର୍ଷ ଏଭଳି କାର୍ଯ୍ୟକ୍ରମ ଆୟୋଜନ କରାଯାଇଥାଏ ବୋଲି ବିଦ୍ୟାଳୟର ଅଧ୍ୟକ୍ଷା ନିଝୁମ୍ ରାଣୀ ପଣ୍ଡିତ ପ୍ରକାଶ କରିଛନ୍ତି ।
