ମ.ରାମପୁର: କଳାହାଣ୍ଡି ଜିଲ୍ଲା ମ.ରାମପୁର ବ୍ଲକ ଅନ୍ତର୍ଗତ ପଣ୍ଡକାମାଲ ପଞ୍ଚାୟତ ଅଧୀନ ତୁଜୁଙ୍ଗ ସରକାରୀ ଉଚ୍ଚ ବିଦ୍ୟାଳୟକୁ ଆସୁଥିବା ଅର୍ଥ ଆତ୍ମସାତ ହେଉଥିବା ଅଭିଯୋଗ ହୋଇଛି। ଏ ନେଇ ବିଦ୍ୟାଳୟ ପରିଚାଳନା କମିଟି ପକ୍ଷରୁ ପ୍ରଧାନଶିକ୍ଷକଙ୍କ ନାମରେ ଜିଲା ଶିକ୍ଷା ଅଧିକାରୀଙ୍କ ନିକଟରେ ଅଭିଯୋଗ କରାଯାଇଛି।
ଅଭିଯୋଗରେ ଦର୍ଶାଯାଇଛି ଯେ, ଗତ ତିନିବର୍ଷ ହେଲା ବିଦ୍ୟାଳୟକୁ ଆସୁଥିବା ବିଭିନ୍ନ ଅର୍ଥ ଆତ୍ମସାତ କରାଯାଉଛି। ଦୁଇଜଣ ସହକାରୀ ଶିକ୍ଷକ କାର୍ଯ୍ୟରେ ଅବହେଳା କରୁଛନ୍ତି। ବିଦ୍ୟାଳୟରେ ୧୩୦ ଛାତ୍ରଛାତ୍ରୀ ପଢ଼ୁଥିବାବେଳେ ପ୍ରତିଦିନ ୫୦/୬୦ ଜଣ ଉପସ୍ଥିତ ରୁହନ୍ତି। କିନ୍ତୁ ପ୍ରତିଦିନ ୧୨୯ ଜଣଙ୍କ ମଧ୍ୟାହ୍ନ ଭୋଜନ ପଡ଼ୁଥିବା ବେଳେ ଏହି ଅର୍ଥ ଆତ୍ମସାତ କରାଯାଉଛି। ପ୍ରତି ମାସରେ ବିଦ୍ୟାଳୟ ପରିଚାଳନା କମିଟି ବୈଠକ ନ କରି ଘର ଘର ବୁଲି ଦସ୍ତଖତ କରୁଛନ୍ତି, ବିଦ୍ୟାଳୟ ବଗିଚାରେ ଛାତ୍ରଛାତ୍ରୀଙ୍କୁ କାମରେ ଲଗାଇ ସହକାରୀ ଶିକ୍ଷକ ନିଜ ଘରକୁ ପନିପରିବା ନେଉଛନ୍ତି ବୋଲି ପଣ୍ଡକାମାଲ ସରପଞ୍ଚ ରୀନା ସାହୁ, ବିଦ୍ୟାଳୟ ପରିଚାଳନା କମିଟି ସଭାପତି ରଞ୍ଜିତା ନାଏକ, ସମ୍ପାଦକ ରବି ସାହୁ, ସୁବୋଧ ସୁନା, ଡାଳିମ୍ବ ସାହୁଙ୍କ ସମେତ ଗ୍ରାମବାସୀମାନେ ଜିଲ୍ଲା ଶିକ୍ଷା ଅଧିକାରୀଙ୍କୁ ଦେଇଥିବା ଅଭିଯୋଗପତ୍ରରେ ଦର୍ଶାଇଛନ୍ତି। ଏ ସମ୍ପର୍କରେ ଦିବାକର ପ୍ରଧାନଶିକ୍ଷକ ଶ୍ରୀଯୁକ୍ତ ସାହୁଙ୍କୁ ପଚାରିବାରୁ ସେ କହିଛନ୍ତି, ସମସ୍ତ ଅଭିଯୋଗ ଭିତ୍ତିହୀନ। ମଧ୍ୟାହ୍ନଭୋଜନ ଯୋଗାଣ ପ୍ରଥମରୁ ଅଷ୍ଟମ ଶ୍ରେଣୀ ଯାଏ ଆସୁଥିବାବେଳେ ବାହାରୁ ଆସୁଥିବା ନବମ ଓ ଦଶମ ଶ୍ରେଣୀର ଛାତ୍ର ଛାତ୍ରୀଙ୍କୁ ମଧ୍ୟ ଖାଇବାକୁ ଦିଆଯାଏ। ତେଣୁ ସେଭଳି କରାଯାଏ।
ଅନ୍ୟପଟେ ଯଦି ଆଗାମୀ ୧୫ ଦିନ ମଧ୍ୟରେ ପ୍ରଧାନଶିକ୍ଷକ, ସହକାରୀ ଶିକ୍ଷୟିତ୍ରୀ, ସହକାରୀ ଶିକ୍ଷକଙ୍କୁ ଅନ୍ୟତ୍ର ବଦଳି କରା ନ ଯାଏ ତା’ହେଲେ ବିଦ୍ୟାଳୟରେ ତାଲା ବନ୍ଦ କରି ଆନ୍ଦୋଳନ କରିବୁ ବୋଲି ପରିଚାଳନା କମିଟି ଚେତାବନୀ ଦେଇଛି।
Comments are closed.