ଭୁବନେଶ୍ୱର : ରାଜ୍ୟର ପରିବହନ ଭିତ୍ତିଭୂମିକୁ ସୁଦୃଢ଼ କରିବା ପାଇଁ ଅଧିକ ଅଭିନବ ପଦକ୍ଷେପ ଗ୍ରହଣ କରାଯିବ ବୋଲି ଇସ୍ପାତ ଓ ଖଣି, ବାଣିଜ୍ୟ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା ପ୍ରକାଶ କରିଛନ୍ତି । ଗତକାଲି ମନ୍ତ୍ରୀ ଶ୍ରୀ ଜେନା ତାମିଲନାଡ଼ୁ ରାଜଧାନୀ ଚେନ୍ନାଇଠାରେ ସେଠାକାର ପରିବହନ ବ୍ୟବସ୍ଥା ସଂପର୍କରେ ବିସ୍ତୃତ ଭାବରେ ଅବଗତ ହୋଇଥିଲେ ଏବଂ ପରିବହନ କର୍ମଚାରୀଙ୍କ ସହିତ ଏକ ବୈଠକରେ ମିଳିତ ହୋଇଥିଲେ । ଏହି ବୈଠକ ସମଗ୍ର ଦେଶରେ ସର୍ବୋତ୍ତମ ଅଭ୍ୟାସଗୁଡ଼ିକ ବୁଝିବା ଦିଗରେ ବେଶ୍ ଫଳପ୍ରଦ ହୋଇଛି ବୋଲି ମନ୍ତ୍ରୀ ଶ୍ରୀ ଜେନା କହିଛନ୍ତି ।
ମନ୍ତ୍ରୀ ଶ୍ରୀ ଜେନା ଚେନ୍ନାଇ ମେଟ୍ରୋପଲିଟାନ୍ ପରିବହନ ନିଗମ ଓ ରାଜ୍ୟ ଏକ୍ସପ୍ରେସ୍ ପରିବହନ ନିଗମ ପରିଦର୍ଶନ କରିଥିଲେ । ମନ୍ତ୍ରୀଙ୍କ ସହିତ ଓଡ଼ିଶା ରାଜ୍ୟ ସଡ଼କ ପରିବହନ ନିଗମର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ଶ୍ରୀ ଦୀପ୍ତେଶ କୁମାର ପଟ୍ଟନାୟକ ଉପସ୍ଥିତ ଥିଲେ । ମନ୍ତ୍ରୀ ଶ୍ରୀ ଜେନା ବିଭିନ୍ନ ପରିବହନ କାର୍ଯ୍ୟକ୍ଷମ ମଡେଲ୍, ନୂତନ ପଦକ୍ଷେପ, ଅନ୍ୟାନ୍ୟ ଆହ୍ୱାନ ଏବଂ ଉଭୟ ରାଜ୍ୟରେ ପାରସ୍ପରିକ ପରିବହନ ବିକାଶ ଦିଗରେ ଭବିଷ୍ୟତ କାର୍ଯ୍ୟପନ୍ଥା ନେଇ ଆଲୋଚନା କରିଥିଲେ । ମନ୍ତ୍ରୀ ଚେନ୍ନାଇ ମେଟ୍ରୋପଲିଟାନ୍ ପରିବହନ ନିଗମର କେନ୍ଦ୍ରୀୟ କର୍ମଶାଳା ପରିଦର୍ଶନ କରିବା ସହିତ ଗୋଟିଏ ସିଟି ବସ୍ରେ ମଧ୍ୟ ଯାତ୍ରା କରିଥିଲେ । ସେ ଯାତ୍ରୀମାନଙ୍କ ସହିତ କଥା ହୋଇଥିଲେ ଓ ଉପଲବ୍ଧ ସୁବିଧାଗୁଡ଼ିକ ଉପରେ ମତାମତ ଗ୍ରହଣ କରିଥିଲେ । ମହାନଗର ପରିବହନ ନିଗମର ପରିଚାଳନା ନିର୍ଦ୍ଦେଶକ ଡ. ଆଲ୍ବି ଜନ୍ ଭର୍ଗିଜ୍ ଓ ଯୁଗ୍ମ ପରିଚାଳନା ନିର୍ଦ୍ଦେଶକ ଶ୍ରୀ ସି. ନଟରାଜନ୍ ତଥା ଅନ୍ୟ ବରିଷ୍ଠ ଅଧିକାରୀ ବୃନ୍ଦ ଉପସ୍ଥିତ ଥିଲେ ।
