କଳାପଥର(ବାଙ୍କୀ): ୩ ଗୋଟି ଜିଲାର ସଙ୍ଗମ ସ୍ଥଳୀ ତଥା ବ୍ୟବସାୟିକ ପେଣ୍ଠ ସ୍ଥଳୀ ଭାବେ ନିଜର ସ୍ୱତନ୍ତ୍ର ପରିଚୟ ରଖିଥିବା କଟକ ଜିଲା ବାଙ୍କୀ କଳାପଥର ମୁଖ୍ୟ ବଜାର ଏବେ ରହିଛି ଜବର ଦଖଲକାରୀଙ୍କ କବ୍ଜାରେ। ସେପଟେ ଜନସାଧାରଣଙ୍କ ସ୍ୱାର୍ଥକୁ ଦୃଷ୍ଟିରେ ରଖି ରାସ୍ତା ପ୍ରଶସ୍ତିକରଣ ସାଙ୍ଗକୁ ଜବର ଦଖଲକାରୀଙ୍କୁ ଉଚ୍ଛେଦ କରିବା ପାଇଁ ଶୁକ୍ରବାର ବାଙ୍କୀ ଉପଜିଲାପାଳ ଦେବୀ ପ୍ରସାଦ ମହାନ୍ତିଙ୍କୁ ଭେଟି ନିଜର ଦାବିପତ୍ର ଦେଇଛନ୍ତି ୩ ଗୋଟି ଜିଲାର ସୀମାରେ ବସବାସ କରୁଥିବା କିଛି ବୁଦ୍ଧିଜୀବୀ। କଳାପଥର ମୁଖ୍ୟ ବଜାର ଉପର ଦେଇ ଶହ ଶହ ସଂଖ୍ୟାରେ ଭାରୀଯାନ ଯାତାୟତ ହେଉଥିବାବେଳେ ୧୦ଟି ସ୍କୁଲ ଓ ୩ ଗୋଟି କଲେଜ ଛାତ୍ରଛାତ୍ରୀଙ୍କଠାରୁ ଆରମ୍ଭ କରି ପ୍ରାୟ ୨୦ ଗୋଟି ପଂଚାୟତର ଅଧିବାସୀଙ୍କର ଏ ହେଉଛି ଏକ ମାତ୍ର ମୁଖ୍ୟ ରାସ୍ତା। ଅନ୍ୟପଟେ ୧୦ଗୋଟି ଜିଲାକୁ ମଧ୍ୟ ଏହି କଳାପଥର ମୁଖ୍ୟ ବଜାର ଦେଇ ଯାତ୍ରୀବାହୀ ବସ୍ ଯାତାୟତ କରେ। ଏଭଳି ସ୍ଥଳେ ଜବର ଦଖଲକାରୀଙ୍କ ରାସ୍ତା ଉପରେ ଉଠା ଦୋକାନର ଆସର ଜମିବା ଦ୍ୱାରା ପ୍ରତ୍ୟେକ ଦିନ ଦୁର୍ଘଟଣା ଘଟୁଛି। ଜନସାଧାରଣଙ୍କ ସୁରକ୍ଷା ସହିତ ଦୁର୍ଘଟଣାକୁ ଏଡ଼ାଇବା ପାଇଁ ତୁରନ୍ତ ପ୍ରଶାସନିକ ସ୍ତରରେ ଜବର ଦଖଲକାରୀଙ୍କୁ ଉଚ୍ଛେଦ ପ୍ରକ୍ରିୟା ଆରମ୍ଭ କରିବା ସହିତ ଉଠା ଦୋକାନୀଙ୍କୁ ଅନ୍ୟତ୍ର ଥଇଥାନ କରିବା ପାଇଁ ବିଭିନ୍ନ ମହଲରୁ ଦାବି ଜୋର ଧରିଛି।
Comments are closed.