ମୁମ୍ବଇ : ବଲିଉଡ଼ରେ ଲଗାତାର ଜଣଙ୍କ ପରେ ଜଣେ ତାରକା କର୍କଟ ରୋଗ (କ୍ୟାନ୍ସର)ର ଶୀକାର ହେଉଥିବା ବେଳେ ଏବେ ପୁଣି ନିର୍ମାତା-ନିର୍ଦ୍ଦେଶକ ରାକେଶ ରୋଶନ ଏହି ରୋଗ କବଳରେ। ରାକେଶ ରୋଶନଙ୍କ ଗଳାରେ କ୍ୟାନ୍ସର ହୋଇଥିବା ତାଙ୍କ ପୁଅ ଅଭିନେତା ହ୍ରିତିକ୍ ରୋଶନ ସାମାଜିକ ଗଣମାଧ୍ୟମ ଜରିଆରେ ଜଣାଇଛନ୍ତି। ହ୍ରିତିକଙ୍କ କହିବା ଅନୁସାରେ, ରାକେଶଙ୍କ କ୍ୟାନ୍ସର ପ୍ରଥମ ପର୍ଯ୍ୟାୟରେ ଅଛି ଓ ଆଜି(ମଙ୍ଗଳବାର) ତାଙ୍କର ଅସ୍ତ୍ରୋପଚାର କରାଯିବ। ହ୍ରିତିକ୍ ସାମାଜିକ ଗଣମାଧ୍ୟମରେ ପିତା ରାକେଶଙ୍କ ସହ ଜିମ୍ ରେ ଥିବା ସମୟର ଏକ ଫଟୋ ଶେୟାର କରିଛନ୍ତି।
ଏହି ଫଟୋ ସହ ହ୍ରିତିକ୍ ଲେଖିଛନ୍ତି, “ଆଜି ତାଙ୍କ ଅସ୍ତ୍ରୋପଚାର ଦିନ ମଧ୍ୟ ସେ ଜିମ୍ ଯିବା ବନ୍ଦ କରି ନାହାନ୍ତି। ସେ ଜଣେ ବହୁତ ଦୃଢମନା ଓ ସାହସୀ ବ୍ୟକ୍ତି। କିଛି ସପ୍ତାହ ପୂର୍ବରୁ ଜଣାପଡ଼ିଛି ଯେ ସେ ପ୍ରଥମ ପର୍ଯ୍ୟାୟର ଗଳା କ୍ୟାନ୍ସରରେ ପୀଡ଼ିତ ଓ ଆଜି ସେ ସେହି ରୋଗ ସହ ଲଢିବାକୁ ଯାଉଛନ୍ତି। ତାଙ୍କ ପାଇଁ ଆମ ସମ୍ପୂର୍ଣ୍ଣ ପରିବାର ଗର୍ବିତ”।
ରାକେଶଙ୍କ କାମ ବିଷୟରେ କହିବାକୁ ଗଲେ, ରାକେଶ ଚଳିତ ଦିନରେ ‘କ୍ରିଶ୍-୪’ର ପ୍ରସ୍ତୁତିକୁ ନେଇ ବ୍ୟସ୍ତ ଥିବା ଜଣାପଡ଼ିଛି। ଏହି ଚଳଚ୍ଚିତ୍ରରେ ପୁଣିଥରେ ରାକେଶ ତାଙ୍କ ପୁଅ ହ୍ରିତିକଙ୍କ ସହ କାମ କରିବେ। ତେବେ ପୂର୍ବରୁ ଏହି ଚଳଚ୍ଚିତ୍ରର ସମସ୍ତ ଭାଗ ଗୁଡ଼ିକ ବହୁ ସଫଳତା ହାସଲ କରି ହିଟ୍ ସାବ୍ୟସ୍ତ ହୋଇଛି।
