ଟିଟିଲାଗଡ଼: ଗଞ୍ଜେଇ ବେପାର କରୁଛନ୍ତି ଶିକ୍ଷକ। ଚାକିରିରେ ଥାଇ ବି ଅଧିକ ରୋଜଗାର ନିଶାରେ ଗଞ୍ଜେଇ କାରବାର କରୁଛନ୍ତି। ପୁଲିସ ଚଢ଼ାଉ ସମୟରେ ଏହି ଘଟଣା ସାମ୍ନାକୁ ଆସିଛି। ଶିକ୍ଷକଙ୍କ ସହିତ ଜଣେ ଲୁଗା ବ୍ୟବସାୟୀ ବି ଧରାପଡ଼ିଛନ୍ତି। ୨ଟି ଜାଗାରୁ ପୁଲିସ ମୋଟ ୬ ଜଣଙ୍କୁ ଅଟକ ରଖିବା ସହିତ ୩ କୁଇଣ୍ଟାଲରୁ ଅଧିକ ଗଞ୍ଜେଇ ଜବତ କରିଛି। ଏକ ଲୁଗା ଗାଡ଼ିରେ ଗଞ୍ଜେଇ ଚାଲାଣ ହେଉଥିଲା। ଏହି ଘଟଣାରେ ବଙ୍ଗୋମୁଣ୍ଡାର ଜଣେ ଲୁଗା ବ୍ୟବସାୟୀ, ଫୁଲବାଣୀର ଜଣେ ଶିକ୍ଷକଙ୍କ ସମେତ ୬ ଜଣଙ୍କୁ ପୁଲିସ ଗିରଫ କରିଛି। ଶିକ୍ଷକ ଜଣକ ବାଲିଗୁଡ଼ା କାର୍ନିବେଡା ୟୁପି ସ୍କୁଲର ବୋଲି ସୂଚନା ମିଳିଛି।
ଟିଟିଲାଗଡ଼ ଥାନାରେ ଏକ ସାମ୍ବାଦିକ ସମ୍ମିଳନୀରେ ଏସପି ରିଷିକେଶ ଖିଲାରୀ ଦେଇଥିବା ସୂଚନା ଅନୁସାରେ, କନ୍ଧମାଳ ଜିଲା ବାଲିଗୁଡା ଅଞ୍ଚଳରୁ ନିୟମିତ ଭାବରେ ଗଞ୍ଜେଇ ଟିଟିଲାଗଡ଼, କଣ୍ଟାବାଞ୍ଜି ଦେଇ ରାୟପୁର ଅଞ୍ଚଳକୁ ଚାଲାଣ ହେଉଥିଲା। ଏହାକୁ ରୋକିବା ଲାଗି ଏସପିଙ୍କ ନିର୍ଦେଶ କ୍ରମେ ଟିଟିଲାଗଡ଼ ଥାନା ଅଧିକାରୀ ଅବନୀ ସାହୁ, ସବ ଇନ୍ସପେକ୍ଟର କିରଣ ଜାନି, ଦେବାଶିଷ ଶତପଥୀ, କଣ୍ଟାବାଞ୍ଜି ଥାନା ସବ ଇନ୍ସପେକ୍ଟର ଅଭିନାଶ ନାଏକ, ବଙ୍ଗୋମୁଣ୍ଡା ଥାନା ଅଧିକାରୀ ସଞ୍ଜୀବ ପ୍ରଧାନ ମିଳିତ ଭାବେ ଏକ ଜଏଣ୍ଟ ଟିମ ଗଠନ କରି ଜାଲ ବିଛାଇଥିଲେ। ଯେଉଁଥିରେ ଧରାପଡ଼ି ଯାଇଥିଲେ ଗଞ୍ଜେଇ ମାଫିଆ। ପୋଲିସ ଟିମ ଟିଟିଲାଗଡ଼ରେ ଏକ ପିକ ଅପ ଏବଂ କଣ୍ଟାବାଞ୍ଜିରୁ ଏକ ବୋଲେରୋରୁ ରେକର୍ଡ ପରିମାଣର ୩ କ୍ୱିଣ୍ଟାଲ ୩୭ କିଲୋଗ୍ରାମ ଗଞ୍ଜେଇ ଜବତ କରିଛି। ବାଲିଗୁଡା ଥାନା ଗୁଳିମରା ଗ୍ରାମର ପ୍ରଭାତ ମୁନି, ମୁଠାବାଲି ଗ୍ରାମର ଶୁଭନାଥ ମହାନନ୍ଦ, ପୂର୍ଣ୍ଣ ବେସରା, ଲନ୍ଦାଗ୍ରାମର ପ୍ରଶାନ୍ତ ନାଏକ, ଘୋଡାବାଲି ଗ୍ରାମର ରାଜୁ ରଣା, ବଙ୍ଗୋମୁଣ୍ଡା ଥାନା ବେଲପଡା ଗ୍ରାମର ବୁଢ଼ୀ ସାଗର ମେହେରଙ୍କୁ ପୁଲିସ ଗିରଫ କରି କୋର୍ଟ ଚାଲାଣ କରିଛି। ଦୁଇଟି ଗାଡି ସମେତ ୬ ମୋବାଇଲ ଫୋନ, ୯୦୦ ଟଙ୍କା ଜବତ ହୋଇଛି।
